Naight Radio Vannin 2003 Brian Stowell

Naight Radio Vannin 8.1.03

TEACHING CRISIS EXISTS ON ISLAND
Teachers are leaving the Island’s schools for the same reasons as those in the UK.

Coardail rish ny skeealyn, ta geyre-ghaue ayns scoillyn Vannin kiart goll rish y geyre-ghaue sy Reeriaght Unnaneyssit. Ta ynseyderyn faagail scoillyn Vannin son ny h-oyryn cheddin as adsyn tessen y keayn.
Sue Moore, Ard-ynseyder Scoill Ard Phurt ny h-Inshey as y çhaghter ynnydagh jeh Sheshaght Ard-ynseyderyn ny Scoillyn Ard, t’ee gra dy vel ynseyderyn faagail son paart dy h-oyryn. T’ad shoh goaill stiagh y doilleeid cliaghtagh jeh rouyr ynseydee ayns brastyllyn, agh, chammah as shen, laadyn noa kyndagh rish curriglym neulhoobagh nagh vel lowal traa da immeeaghtyn taitnyssagh son ynseydee. Ta shoh traastey ynseyderyn ny smoo.
Er lhimmey jeh shen, ta Benainshtyr Moore gra nagh vod ynseyderyn ennagh tannaghtyn feer foddey ayns Mannin er y fa nagh vod ad fordrail kionnaghey thieyn.


GROUP AIMS TO REDRESS ENVIRONMENTAL BALANCE
The Isle of Man’s branch of Agenda 21 is calling for more to be done to preserve the Island’s environment and heritage.

Ta banglane Vannin jeh Agenda 21 (Claare-Obbyr 21) geearree tooilley dy ve jeant dy ’reayll çhymmyltaght as eiraght yn Ellan. Hie Agenda 21 er enmys myr shen dy hoilshaghey cooishyn-boirey yn chied cheead as feed. V’eh currit er bun lurg çhaglym-mullee ny h-Ashoonyn Unnaneyssit ayns Rio sy vlein nuy cheead jeig, kiare feed as daa-yeig. T’eh kiarail cur er sleih smooinaghtyn ‘Smooinee er y chruinney, eisht jean reddyn feie ny cruinney’.
Ta kuse dy heeraghyn er ngoaill yn claare-obbyr ayns laue, as ta fir-oik oc ayns lughtyn-reill ynnydagh ta cur coyrle mychione cummalaghys (sustainability) bentyn rish lhiasaghyn (developments) vees goll er oi ayns ny h-ardjyn oc.
Oltey jeh possan yn Ellan, Muriel Garland, t’ee gra dy by vie lhee dy beagh tooilley geill politickagh currit da ardsmooinaghtyn çhaglym-mullee Rio, ga nagh ghow Mannin ayrn sy çhaglym shen.


MANX CLIMBER TO ATTEMPT EVEREST AGAIN
John Crellin hopes to be the first Manxman to reach the summit of the world’s highest peak.

Nee slieaueyder Manninagh, John Crellin, prowal reesht dy ghrappal seose Slieau Everest, as eshyn jerkal dy ve yn chied Vanninagh dy roshtyn y mullagh jeh baare syrjey yn teihll. Haink drappal jerrinagh John Crellin gy kione lesh doo-skeeal tra hooar co-lieaueyder baase. Begin cur seose y drappal, as sleih gaggyrts dy row sheshaght-reaghee yn drappal er reirey reddyn dy moal. She cooish-leigh t’ayn nish.
Agh ta John Crellin slane soit er roshtyn y baare jeh’n clieau syrjey ayns gagh fer jeh shiaght mooar-rheynnyn y teihll. Lurg da drappal queig jeu dy speeideilagh, t’eh shickyr dy jean eh roshtyn mullagh Everest. Nee Mainshtyr Crellin yn eab echey ny s’anmagh sy vlein, as eshyn kiarail roshtyn y baare ayns Mee Boaldyn. As bee traa dy liooar echey foast dy heet erash as goaill ayrn sy TT!


DRUGS SENTENCES - APPEALS TURNED DOWN
Four people sentenced to two and a half years have had an appeal turned down.

Lurg aachlashtyn syn Ard Whaiyl mychione ny deyraghyn ec kiare persoonyn son loghtyn-druggaghyn, dob ny briwnyn shallidagh Carter as Scholes ny deyraghyn y chaghlaa. Wendy Peel, Timothy Barnett, Carl Wood as Nicola Corkish, v’ad ooilley faagit mooie son loghtyn eigsoylagh (various) bentyn rish geddyn ecstasy son sleih elley er y hoghtoo laa jeh Mee Vayrnt nurree. V’ad ooilley goit ec ny meoiryn-shee ayns Obbraghyn ‘Sauçhey’ (‘Safe’) as ‘Daiman’ (‘Diamond’).
Va aachlashtyn ayn er y fa dy row eh baghtal dy row ny deyraghyn oc ro hrome, v’eh grait - va gagh peiagh deyrit gys daa vlein dy lieh y pheesh ayns pryssoon. Agh, as adsyn jiooldey yn aghin, dooyrt ny briwnyn shallidagh nagh row eh er ny phrowal dy row ny deyraghgyn ro hrome, as dy row ny deyraghyn kiart coardail rish reillyn t’ayn nish.
Ny sodjey, dooyrt ad dy beagh bree currit da deyrey sloo jeh queig bleeaney ayns pryssoon roish foddey. Hug ad coyrle dy yiooldey aachlashtynyn myr shoh sy traa ry heet.


‘Old’ and ‘New’ Festivals
The change in the calendar in the distant past meant that people ended up with two separate dates to commemorate a particular festival. For instance, 5th January was Shenn Laa Nollick, Old Christmas Day - still recognised in parts of the Isle of Man until about 100 years ago.
There is a proverb connected with this day: ‘My ta kay er ny sleityn Shenn Laa Nollick, bee palçhey skeddan goll’ - ‘If there’s mist on the mountains on Old Christmas Day, there’ll be plenty of herring going’.
And 12th January is Shenn Laa Nollick Beg - Old New Year’s Day (‘Old Little Christmas Day’).


Naight Radio Vannin 15.1.03

GOVERNMENT DEPARTMENT IS ‘MOVING THE GOALPOSTS’ CLAIM
The pressure group ASAP says the Department of Local Government and the Environment is not giving the public accurate or sufficient information.

Y possan-traastee ASAP, t’ad gra nagh vel Rheynn Reiltys Ynnydagh as y Çhymmyltaght cur fys kiart ny fys dy liooar da’n theay mychione yn ynnyd lhieeney thalloo (landfill site) ec Arçhallagan. Ta’n Rheynn gra dy vel garey biljagh Arçhallagan soit myr y boayl share son y seyraad (facility), agh cha nel ASAP coardail rish shen. T’ad gra dy vel y Rheynn gra reddyn mychione Arçhallagan nagh vel kiart. Ta’n possan-traastee gra dy beagh yn ynnyd lhieeney thalloo 8.49 hectare er mooadys sy toshiaght, agh nish bee eh jeih as daeed sy cheead (50%) ny smoo na shen, coardail rish ny plannyn va currit roish.
Chammah as shen, ta ASAP gra dy row eh grait ec çhaglym theayagh dy beagh ushtey sollit currit lesh ersooyl veih’n ynnyd ayns doaghyn troailt. Agh nish t’eh jeeaghyn dy bee yn ushtey sollit goll er tashtey ayns mooirlee (lagoons), as eisht roie stiagh ayns awinyn sy jerrey. James Vickers, loayrtagh son y possan-traastee, dooyrt eh nagh vod treisht ve currit sy Reiltys bentyn rish y chooish shoh.


SKIP HIRE COSTS WILL LEAD TO JOB LOSSES, SAYS OWNER
Wilf Young suggests that the price of hiring a skip will soar.

Wilf Young, y shellooder jeh colught failley-kishan, t’eh gra dy nee ‘baanrys’ y costys jeh failley kishanyn tra vees sleih geeck ny symyn-argid noa ayns Mee Averil va reaghit ec y Reiltys son clashal (tipping) orçh.
Ta Mainshtyr Young cur sannish dy jean y costys jeh failley kishan getlagh seose dys foddey ny smoo na queig ny shey cheead punt, tra vees orçh costal keead punt y thunney ec yn ynnyd lhieeney thalloo. T’eh credjal dy bee tooilley sleih clashal orçh dy h-anleighalagh kyndagh rish shen. T’eh gra dy vel y Reiltys er vailleil dy ghoaill vondeish jeh ymmodee ynnydyn elley mygeayrt yn Ellan oddagh jannoo myr ynnydyn lhieeney thalloo veagh neugheyr as fondagh.
Ta Mainshtyr Young cur y loght dy bollagh er y Reiltys as sharvaantyn theayagh.


THERE COULD BE FURTHER INCREASES IN THE PRICE OF GAS
Yesterday, the Managing Director of Manx Gas announced an 8% rise.

Chris Sidley, y Stiureyder Reirey jeh Gas Vannin, t’eh cur faaue dy noddagh troaryn e cholught costal ny smoo ayns ny meeghyn ry heet. Y laa jea, dooyrt Mainshtyr Sidley dy bee mooadaghey jeh hoght sy cheead (8%) ayns ooilley ny claareyn-costys son ard-phiobyn (mains tariffs) veih’n çhiaghtin shoh çheet. Va shoh kyndagh rish y vaggyrt jeh caggey syn Earack, as stholk ny h-obbreeyn-ooill ayns Venezuela.
V’eh jerkal dy beagh yn mooadaghey-prios mooar dy liooar da costyssyn-troarey brash (extra production costs) eddyr nish as jerrey yn gheurey, agh cha dod eh ve shickyr mychione shen.


GOVERNMENT LETTER OF CONDOLENCE TO THE GIBB FAMILY
The letter of condolence is addressed to Maurice Gibb’s widow, Yvonne.

Ta Reiltys Vannin er chur screeuyn cocheayney gys lught-thie Bee Gee Maurice Gibb, hooar baase ec y jerrey-shiaghtin. T’eh goll er oanluckey jiu.
Ta’n Ard-Hirveishagh assairagh, as hug y Shirveishagh Turrysid, David Cretney, yn ennym echey er y screeuyn, ta goll gys Yvonne, ben-treoghe Maurice, ayns Florida.


GANG FIGHTS CAUSING CONCERN
A Douglas Councillor is expressing concern over youths gathering in Noble’s Park.

Ta Coonseilagh ayns Doolish, Lynda Ramsay, gra dy vel ee boirit mychione yn aght ta sleih aeg çhaglym cooidjagh ayns Pairk Noble. T’ee gra dy vel gengyn dy stuggaghyn veih ayrnyn eigsoylagh (various) jeh’n valley goll gys shen, jerkal rish caggey. Ta’n Coonseilagh Ramsay gra dy row skeeal ayn y çhiaghtin shoh chaie dy row eh jeeaghyn dy row possan jeh feed persoon aeg gaghtey dy eulyssagh noi ry hoi. T’ee gra dy nhegin sthap y chur dy çhelleeragh da aghtey erbee myr shoh, roish my vees eh goll er dy cliaghtagh.
Loayr y Coonseilagh Ramsay magh er y gherrid noi jeeyl yoinagh (vandalism) ayns ynnydyn-cloie yn Cho-Chorp. T’ee gra dy noddagh earrooyn mooarey dy ’leih aeg, marish caggey-possan, foddee, as jough veshtallagh, dy noddagh shen croo immeeaght olk.


The Bee Gees and ‘Ellan Vannin’
The sad death of Maurice Gibb reminded me of the great recording they did of ‘Ellan Vannin’ the unofficial Manx national anthem. Not long after this was released, someone in the Isle of Man Postal Authority contacted me and suggested that the Bee Gees might be willing to do another recording of ‘Ellan Vannin’, but this time in Manx.
I did a new translation into Manx of the song and this was sent off to the Bee Gees by the Postal Authority, along with guidance on the pronunciation of the Manx. What a pity we didn’t hear any more!


Naight Radio Vannin 22.1.03

ENVIRONMENT MINISTER DEFENDS RISE IN WASTE TIPPING COSTS
Pam Crowe says it will encourage people to be more responsible with their waste.

Ta Shirveishagh y Çhymmyltaght, Pam Crowe, er vendeil e briwnys dy hirrey costyssyn jeh keead punt y thunney son geddyn rey rish orçh veih’n chied laa jeh Mee Averil. T’ee gra dy jean eh greinnaghey sleih dy ve ny smoo currymagh lesh yn orçh oc, as dy chur geill da’n raa ‘aa-choorsal, leodaghey as aa-ymmydey’. T’ee gobbal dy jean y costys cur er sleih dy chlashal (to tip) dy h-anleighalagh.
Agh ta Sheshaght y Lught-Traghtee (Chamber of Commerce) gra dy noddagh colughtyn-dellal goll er brishey mannagh vees y Reiltys smooinaghtyn reesht mychione ny costyssyn jeh geddyn rey rish orçh. Ta’n Çheshaght gra nagh lhisagh reddyn goll er caghlaa son blein er y chooid sloo, choud’s ta ymmodee possanyn shirrey yn feaysley share.
T’ad cremmey yn Reiltys er y fa dy vel y Reiltys ‘jannoo drogh red dy siyragh dy ’eaysley doilleeid t’ad er haghney dellal rish son kuse dy vleeantyn.’ Lhiass-Chaairliagh y Çheshaght, Stuart McCudden, t’eh gra dy noddagh colughtyn-dellal goll er brishey kyndagh rish ny costyssyn syrjey.


CHANGES TO ONCHAN’S RATES SYSTEM
Up to now, Onchan has been divided into the urban and the rural.

Bentyn rish ny keeshyn ynnydagh (rates), oddagh Barrantee Kione Droghad - Connaghyn caghlaa yn dooghys jeh’n ard oc. Gys nish, ta Kione Droghad - Connaghyn er ny rheynn ayns ard-çheerey as ard-baljagh, as sleih syn ard-çheerey geddyn leodaghey jeh lieh-cheead sy cheead (50%) ayns ny keeshyn ynnydagh oc. Agh nish ta treealtys ayn nagh lhisagh sleih syn ard-çheerey geddyn y leodaghey shen.
Y Barrantagh David Quirk, hug y treealtys roish ec jerrey ny bleeaney shoh chaie, t’eh laccal y caghlaa er y fa dy bee yn Reiltys mooadaghey yn costys jeh geddyn rey rish orçh. Ta’n lught-reill ynnydagh er ve abyl jannoo lheid y chaghlaa neayr’s y vlein nuy cheead jeig, kiare feed as jeih. Ta Mainshtyr Quirk arryltagh dy chur y caghlaa er e hoshiaght, ga dy vel adsyn ta cummal syn ard-çheerey cliaghtit rish keeshyn ynnydagh leodit - as ta’n Ard-Hirveishagh ny mast’oc shid.


GOVERNMENT PLAN ENDORSED BY TYNWALD
An attempt to adjourn the debate to July failed.

Ren Tinvaal coardail rish plan tree bleeaney noa ec y Reiltys lurg resoonaght kiare oor dy lieh. Haink y resoonaght gys jerrey ec lieh-oor lurg shiaght fastyr Jemayrt.
Peter Karran, oltey jeh’n Chiare as Feed son Kione Droghad, phrow eshyn y resoonaght y chur sheear gys Jerrey Souree, agh ren yn eab shen failleil. As cha dod Hazel Hannan, yn oltey jeh’n Chiare as Feed son Purt ny h-Inshey, cha dod ish cur er Tinvaal goaill rish imraa yn phlan syn ynnyd jeh coardail rish.
Ec jerrey yn resoonaght, ren hoght olteynyn as feed votal son strateysh chadjin y phlan. Cha nee agh Benainshtyr Hannan as Mainshtyr Karran ren votal noi.
Haink y resoonaght shoh roish Bushaid Vannin (Manx Budget) y vee shoh çheet as ny myn-phabyryn polasee veih rheynnyn-reiltys.


PASSENGER FIGURES FOR DOUGLAS HARBOUR CONTINUE TO RISE
Director of Harbours Captain Michael Brew is delighted with the increases.

Ny h-earrooyn dy hroailtee-marrey son Doolish sy vlein daa veeilley as jees (2002), v’ad ny h-earrooyn syrjey neayr’s nuy cheead jeig, kiare feed as kiare. Va ny shlee na shey cheead as shiaght jeig as daeed meeilley (657,000) dy hroailtee-marrey recortyssit. Va shoh ny vishaghey jeh shey-jeig sy cheead (16%), bunnys, cosoylit rish ny h-earrooyn ayns daa veeilley as nane.
Hie ny h-earrooyn dy charbid seose neesht, gys ny shlee na hoght feed as daa-yeig dy veeillaghyn (172,000), bishaghey jeh nuy as feed sy cheead (29%) cosoylit rish earrooyn daa veeilley as nane. Ren traaght-traghtee (commercial traffic) bishaghey neesht, liorish hoght sy cheead as ny smoo.
Va’n bishaghey smoo ec raad-marrey Veeal Feirshtey, lesh bishaghey jeh nane-jeig as feed sy cheead cosoylit rish nurree. Hie ny h-earrooyn son Lerpoyll seose liorish shiaght-jeig sy cheead, as hie adsyn son Heysham seose liorish tree-jeig sy cheead.
Stiureyder ny Purtyn, y Captan Michael Brew, t’eh jeant feer wooiagh ec y vishaghey. T’eh gra dy vel eh jeeaghyn dy bee ny h-earrooyn gaase dy fondagh mleeaney myrgeddin. Ghow yn aase toshiaght sy vlein nuy cheead jeig, kiare feed as nuy-jeig.


Doom and Hope in saying.

Saturday is 25th January is Laa’l Noo Paayl - St Paul’s Feast Day.
Like most saints’ days, this has a saying (a long one) connected with it:
‘Laa’l Paayl dorrinagh, geayee / Genney er y teihll as baase mooar sleih. /
Laa’l Paayl aalin as glen, / Palçhey er y teihll dy arroo as meinn.’
(‘St Paul’s day - stormy and windy, / Want in the world and great death of people. /
St Paul’s day fine and clear, / Plenty of corn and meal in the world’.)

Unlike some Manx sayings, this one has a bright side to it!


Naight Radio Vannin 29.1.03

REWARD OFFERED FOR INFORMATION REGARDING ROBBERY
Police are investigating an armed robbery at Kirk Michael filling station.

Ta ny meoiryn-shee ronsaghey roosteyrys armit ec stashoon-pedryl, raad va tendeilagh er ny vaggyrt lesh skynn. Haghyr shoh mysh jeih minnid lurg hoght syn ’astyr, as hie yn gaddee roish lesh argid veih’n tayrnag-argid. Dy aighoil cha row peiagh erbee er ny lhottey, agh ta offishearyn veih squad ny loghtyn trome-chooishagh er ve ec y stashoon, va tannaghtyn dooint.
Sleih veih’n cholught-ooill Total, ta stiurey yn stashoon, t’ad çhebbal leagh jeh daa veeilley punt da peiagh erbee vees cur fys leeidagh gys geddyn foiljagh fer ennagh. Ta lught Total gra dy bee ad gaareayrtyssey yn shickyrys (security) oc.
Y dooinney ren craa skynn, t’ad gra dy vel eh mysh queig trie as jeih oarlagh, ny shey trie, er yrjid, castreycair sy chorp echey, as foddee dy vel eh mysh feed blein dy eash.
V’eh ceau perree-loamrey dorraghey lesh tayrnag as troosyn dorraghey, as va garmad dorraghey harrish yn eddin echey. Reireyder-Creck Total Ellan Vannin, Andrew Corrie, t’eh gra dy vel y taghyrt liorish hene, agh hed cooishyn-shickyrys er ronsaghey. Sleih erbee oddagh cooney lesh ny meoiryn-shee, t’ad shirrey orroo dy yllagh er Unnid ny Loghtyn Trome-Chooishagh, ec ard-stashoon ny meoiryn-shee ayns Doolish er 631212, ny er linney ny Scuirreyderyn-Loght (Crimestoppers), 0800 555111.


NO NEED FOR CONCERN OVER HEALTHCARE PROVISION IN RAMSEY
The Health Minister says Leonard Singer’s concern is pure speculation.

Y Shirveishagh-Slaynt, Clare y Christeen, t’ee gra nagh nee agh sheiltynys y boirey ta jannoo er Leonard Singer, oltey jeh’n Chiare as Feed son Rhumsaa, bentyn rish y livrey-ys jeh kiarail-slaynt ayns Rhumsaa. Ayns Tinvaal y çhiaghtin shoh chaie, dooyrt Mainshtyr Singer dy row eh credjal dy jinnagh caghlaaghyn ayns conaantyn ny fir as mraane-lhee cadjin leeideil gys leodaghey sy çhirveish geyre-ghaue (emergency cover) ayns Rhumsaa as mygeayrt. Dooyrt eh dy heill eh dy row shoh myr ayrn jeh giarrey sheear kiarail-slaynt son sleih er y twoaie.
Agh ta Benainshtyr y Christeen gra, ga dy bee caghlaaghyn ayn ayns ny tree mee ta ry heet, cha nel briwnyssyn erbee jeant foast as she sheiltynys t’ec Mainshtyr Singer. Ta Mainshtyr Singer gra dy vel boirey firrinagh ayn nagh bee fer-lhee ny ben-lhee ec Thie-Lheihys Cott Rhumsaa çheu-mooie jeh ooryn-obbyr reiltagh. As mannagh vel shen kiart lhisagh Benainshtyr y Christeen gra nagh vel.


CHIEF MINISTER SAYS CLAIMS OF CONTINUING POOR SERVICE FROM BA CITIEXPRESS ARE UNFOUNDED
Mr Corkill told the House of Keys ‘it would be unrealistic to expect British Airways to alter their group strategy’.

Dinsh yn Ard-Hirveishagh da’n Chiare as Feed ‘dy beagh eh neu-rieughagh dy yerkal dy jinnagh Raaidyn-Aer Goaldagh caghlaa nyn strateysh-phossan dy heet jesh da Ellan Vannin ny lomarcan’.
V’ad er hirrey er Mainshtyr Corkill eh dy ghra red ennagh mychione ‘yn çhirveish voal chinjagh’ veih’n linney-aer, coardail rish aggyrtyn. Lurg ronsaghey, dooyrt eh, v’eh er ny hoilshaghey nagh row anchaslys, son y chooid smoo, eddyr barrantoilid as stundayrtyn Raaidyn-Aer Goaldagh as barrantoilid as stundayrtyn Skianyn Vannin. Ny sodjey, dooyrt eh dy row BA CitiExpress gobbraghey er yn aght cheddin as v’ad gobbraghey feiy ny cruinney


ZERO TOLERANCE POLICING IS NOT APPROPRIATE FOR THE ISLE OF MAN
The Home Affairs Minister said zero tolerance policing would be too much of a drain on Manx police resources.

Coardail rish Shirveishagh Cooishyn Sthie, Phil Braidwood, cha nel poleeney lesh veg dy lowaltys (zero tolerance policing) cooie da Mannin. Va Mainshtyr Braidwood freggyrt feysht veih Martin Quayle, yn oltey jeh’n Chiare as Feed son Medall, ec Traa ny Feyshtyn sy Chiare as Feed.
Dooyrt Mainshtyr Braidwood dy row poleeney lesh veg dy lowaltys speeideilagh ayns ard-valjyn casley rish York Noa, agh veagh eh costal rouyr ayns Mannin.


STEAM PACKET PLANS TO IMPROVE PIER HEAD FACILITIES AT LIVERPOOL
The Steam Packet Managing Director hopes the end result will be an ‘all-singing, all-dancing facility’.

Hed y Paggad Bree er oi lesh plannyn dy haraghey ard Kione y Pheer ayns Lerpoyll son troailtee-marrey. Dooyrt Hamish Ross, Stiureyder-Reirey yn Phaggad Bree, dy vel genney-sharaghey ayns shen er chur yn olk er dy bollagh neayr’s haink eh gys Mannin. Tra vees reddyn cooilleenit, t’eh jerkal dy bee dy chooilley nhee ry gheddyn ayns shen. Ta’n obbyr dy haraghey reddyn fo raad hannah.

Naight Radio Vannin 5.2.03

SNOW BRINGS TRAFFIC CHAOS
An inch of snow yesterday evening brought most of the central belt in the Island to a standstill.

Oarlagh dy ’niaghtey riyr, ren eh cur sthap er y chooid smoo jeh mean yn Ellan. Ta Giat y Clieau tannaghtyn dooint. Doolish as raad y clyst-marrey eddyr Skylley Maayl as Cronk y Voddee, v’ad shid mastey ny buill smessey. Va carbid-ghrineen veih Rheynn Arraghey er nyn yllagh magh dy haraghey reddyn, as ee ad gobbraghey reesht moghrey jiu.


NOBLE’S HOSPITAL OPEN AS NORMAL
All today’s planned admissions are to go ahead as usual, after the situation caused by the Winter Vomiting Bug.

Ooilley ny surransee v’ad kiarail lhiggey stiagh ayns Thie-Lheihys Noble y laa jiu, bee ad er nyn lhiggey stiagh myr dy cliaghtagh. Hie shen er reaghey jea, lurg da lught y thie-lheihys jannoo aareayrtys mychione y çhingys Tilgey-Geuree. Ta’n çhingys shoh er ve jannoo er skimmee as surransee rish shiaghtin as ny smoo. As ta Ward Nuy er ny ’osley reesht.
Peiagh erbee v’eh reaghit da ny jee dy gholl stiagh son lheihys y laa jiu, ta Reireyder y thie-lheihys, Frank Inman, gra dy lhisagh ad çheet dys y thie-lheihys myr dy cliaghtagh. Gagh laa son y chooid elley jeh’n çhiaghtin, bee ad freayll arrey er yn aght ta Tilgey-Geuree er nyannoo er skimmee Thie-Lheihys Noble.


IRIS SCHEME EXHIBITION IN SOUTH OF ISLAND
An exhibition of the Iris Scheme and how it’s progressing in the south was held in Port St Mary last night.

Taishbynys jeh Skeym Iris as yn aght t’eh goll er oi sy jiass, v’eh er ny chummal ayns Purt le Moirrey riyr. Hed y taishbynys er cummal reesht fastyr jiu eddyr shey as hoght er y chlag, ayns yn çhamyr-farkee jeh’n stashoon-traen ayns Purt Çhiarn.
Mark Gorry, y jeshaghteyr cummaltagh son ny fir-choyrlee, Burrows Stewart, t’eh gra dy vel shoh cur caa da sleih dy vriaght feyshtyn. Ta Mainshtyr Gorry gra dy vel ad laccal jannoo yn boirey sloo oddys ad.


NATIONAL IDENTITY: CELTIC LEAGUE RESPONDS
The Celtic League is questioning whether the Government is right to link national identity to economic progress.

Ta’n Commeeys Celtiagh briaght vel y Reiltys kiart dy chiangley jarroo-enney ashoonagh lesh goll er oi tarmaynagh. Ta’n Ard-Hirveishagh er ghra dy nhare çhymmyltaght tarmaynagh (economic environment) ta tayrn sleih gys Mannin na çhymmyltaght boayl ta’n cultoor Manninagh goll er thannaghey, kyndagh rish Manninee eginit faagail yn Ellan dy hirrey kiartaghyn boayl ennagh elley. As ta Brian Stowell, fer-ynsee as Gaelgeyr, gra dy vel sleih ennagh ta garraghey gys Mannin jannoo foays da’n chultoor Manninagh (cha nee ‘cultoor ynnydagh’ myr screeu peiagh ennagh sy naight ayns Baarle).
Agh ta’n Commeeys Celtiagh gra nagh vel y Reiltys cur geill da Manninee ta smooinaghtyn dy vel y bieauid jeh caghlaa gee seose y jarroo-enney ashoonagh. Ta’n Commeeys gra dy vel ram sleih smooinaghtyn dy vel goll er oi tarmaynagh lhiettal y Reiltys as eh kiarail sharaghey gien sheshoil (social well-being), quallid y çhymmyltaght as jarroo-enney ashoonagh jarrooagh (positive national identity).


Types of wedding

Looking through Doug Fargher’s Manx dictionary, I discovered a couple of strange terms for weddings:
‘poosey fannag’ = ‘a crow wedding’ - a wedding where none of the wife’s relatives is present.
‘poosey pieannad’ = ‘a magpie wedding’ - a wedding where no relatives at all are present.


Naight Radio Vannin 12.2.03

NINE MILLION POUNDS FOR REDEVELOPMENT OF OLD GOVERNMENT BUILDINGS
This will include a new library, new offices and alterations to the Tynwald court.

Yn çhiaghtin shoh çheet, bee ad shirrey er Tinvaal coardail rish ceau ny smoo na nuy millioon punt dy aa-lhiasaghey (redevelop) as jannoo ass y noa ny shenn troggalyn-reiltys ec Crongan y Reayrt. Bee lioarlann noa as offishyn noa ayn. As hed shamyr-Tinvaal er caghlaa, goaill stiagh lout-reayrtey noa (new viewing gallery).
Loayreyder y Chiare as Feed, Tony Brown, t’eh gra dy vel ad er ve kiarail jannoo yn obbyr neayr’s y vlein nuy cheead jeig, kiare feed as tree-jeig. Ta lowanse son y skeym sy vushaid (budget) mleeaney. T’ad jerkal dy bee yn obbyr goaill eddyr daa vlein dy lieh as tree bleeaney. My vees eh coardit ec Tinvaal, oddagh yn obbyr goaill toshiaght ec y jerrey jeh Mee Averil.
Stiureyder-Shalee (Project Director) yn obbyr, Phil Halliwell, t’eh gra dy vel ad kiarail obbraghey dy co-ennaghtagh as freayll wheesh as oddys ad. T’eh gra dy bee ad freayll ny troggalyn myr t’ad nish çheu-mooie. Çheu-sthie, hed ad er jeianaghey (modernised). Agh, son y chooid smoo, freillee ad ny troggalyn myr t’ad ec y traa t’ayn.


WAR PENSIONS COMMITTEE NOMINATIONS SOUGHT
The committee administers various funds on behalf of ex-service personnel.

Ta’n theay goll er cuirrey dy enmys sleih dy heet dy ve nyn olteynyn jeh Bing Penshynyn-Caggee Ellan Vannin. Ta shoh ry hoi kiare soiagyn da sleih nagh vel nyn olteynyn jeh Tinvaal. Ta’n Ving stiurey tashtaghyn-argid anchasley, ass lieh sleih hug shirveish-sidooragh. Ec y traa t’ayn, ta kiare olteynyn ec y Ving, pointit liorish Coonseil ny Shirveishee, agh ta reamys da kiare olteynyn elley.
Mastey reddyn elley, ta’n Ving goaseiraghey Shirveish-Lhiass (Welfare-Service) ny Penshynyn-Caggee. As t’ee co-stiurey yn obbyr jeusyn ta cooney lesh penshyneyryn-caggee as mraane-treoghe-caggee.
Yn earroo jeusyn ta geddyn vondeish liorish obbyr y Ving, t’eh goll sheese, kyndagh rish sleih geddyn baase. Agh, myr ta lught y Reiltys gra, y feme ocsyn ta foast er mayrn, t’eh gaase as adsyn çheet dy ve ny shinney. Lhisagh enmysaghtyn ve currit gys offish yn Ard-Scrudeyr roish jerrey’n vee.


COUNCIL’S TRIBUTE TO BASIL CALLOW
Councillor Callow, who was Mayor of Douglas from 1992 to 1993, died suddenly yesterday morning.

Ver coonseilee Ghoolish arrym da eear cho-obbree, Basil Callow, roish y çhaglym bushaid bleinoil jiu. Nee ny coonseilee shassoo ayns tostid. Hooar y Coonseilagh Callow baase dy doaltattym moghrey jea. V’eh yn Meoir jeh Doolish veih’n vlein nuy cheead jeig, kiare feed as daa-yeig gys kiare feed as tree-jeig.
Va dellal-shenndaght echey, as v’eh er ny reih gys y Choonseil son y chied cheayrt sy vlein nuy cheead jeig, kiare feed as kiare. Daag eh e ven as mac.
Lurg daue cur arrym da’n eear cho-obbree oc, reaghee Coonseilee raayt y valley son y vlein shoh çheet. Fer-Toshee yn Choonseil, David y Christeen, t’eh er veeraghey dy bee ad shirrey er coonseilee coardail rish mooadaghey jeh jeih sy cheead sy raayt.
Nurree, hie yn raayt seose liorish shey sy cheead. Ta Coonseilagh y Christeen er veeraghey dy vel feme er yn argid brash y keayrt shoh kyndagh rish yn argid ta’n Reiltys shirrey veih’n chied laa jeh Jerrey Souree son geddyn rey rish orçh.
T’eh cur raaue neesht dy beagh y mooadaghey sy raayt er ve jeih as feed sy cheead mannagh beagh aayeeilley jeh kiare feed as jeih sy cheead er ny choardail.


The Old Feast Day of St Brigid

12th February is the Old Feast Day of St Brigid - it was also known as the Day of Caillagh ny Gueshag - the Old Woman of the Charms. She was a witch who survived being thrown into the sea off Ireland and floated to the Isle of Man, landing here on the morning of 12th February. The weather was fine, so she was able to gather sticks to make a fire to dry herself. The spring that year was wet.
The belief grew up that if Caillagh ny Gueshag was not able to gather sticks on the morning of 12th February, the spring would be fine, and vice versa.
So, fine weather on the morning of 12th February means a wet spring, and vice versa.


Naight Radio Vannin 19.2.03

BUDGET APPROVED
Tynwald has unanimously supported the Treasury Minister’s budget.

Lesh un aigney, ta Tinvaal er phohlldal bushaid (budget) Allan Bell, y Shirveishagh-Tashtee, son y vlein argidoil shoh çheet. Lurg resoonaght jeh shey oor as ny smoo, dooyrt Mainshtyr Bell dy row yn vushaid ny phaggey dy hreealtyssyn va jarrooagh as jeeaghyn er oi, as ee kiaddit dy chummal seose y speeideilys jeh tarmaynys ta goll er caghlaa.
Agh ta reddyn sy vushaid er chur beggan dy yindys er ard-traghteyr argidoil (leading financial commentator). Ta Nick Williamson veih Treishteilee Walbrook (Ellan Vannin) cur faaue dy row yn Shirveishagh-Tashtee ro twoaieagh as y tarmaynys foast ayns stayd feer vie. T’eh gra dy vel gaue ayn dy noddagh y çhaghteraght goll magh dy vel yn Ellan ‘çhionney e chryss’ dy choadey kiartaghyn as feer veggan dy leih shirrey kiartey.
Dooyrt y Shirveishagh-Tashtee dy row eh slane soit er çhaglym keeshyn nagh row eeckit foast. Lurg da Tinvaal pohlldal e vushaid lesh un aigney, dooyrt Allan Bell dy beagh y rheynn echey cur geill jeean da colughtyn as persoonyn va jannoo drogh ymmyd jeh reillyn-keesh foayroil yn Ellan.


MICRO-CHIPPED WHEELIE-BINS FOR PEEL
Peel Commissioners are to start a six-month trial of wheelie-bins fitted with micro-chips.

Ta Barrantee Phurt ny h-Inshey goaill ayns laue prowalys shey mee jeh coir-wheeylagh lesh meegra-slissagyn (micro-chips). Myr shen, foddee ny coir-wheeylagh goll er meihaghey choud’s t’ad goll er folmaghey.
Ta ny Barrantee reaghey shoh as y Reiltys er çhee shirrey tooilley argid son geddyn rey rish orçh. Bee yn argid shoh er ny hroggal liorish ny keeshyn-ynnydagh (ny raaytyn). Kyndagh rish coarys ny meegra-slissagyn (the micro-chip system), foddee gagh peiagh geeck reir y mooadys dy h-orçh t’ad ceau magh. Haink yn eie rish lurg da kuse dy lughtyn-reill ynnydagh cur shilley er y Phobblaght Yernagh, raad t’ad goaill ymmyd jeh’n choarys shoh.


LOWER AIR FARES TO LIVERPOOL
BA CitiExpress is trying to bring passengers back to its Liverpool service.

Ta BA CitiExpress prowal tayrn troailtee erash gys e hirveishyn liorish giarrey yn costys jeh etlagh gys Lerpoyll. Ayns Jerrey Geuree, ren feed sy cheead ny sloo dy hroailtee getlagh er ny h-etlanyn oc na detlee er etlanyn Skianyn Vannin sy traa cheddin nurree. Dooyrt y colught dy vel eh çhebbal barrantys er gagh soiag er yn etlan ta goll gys Lerpoyll ec jeih minnid gys munlaa son tree feed as nuy punt, goll as çheet.
Agh, ga dy vel BA gra dy vel ad çhebbal shoh son lhing nagh vel soit, bee ad cur geill da’n earroo dy leih ta goaill yn çheb, as nee ad eh y aareayrtyssey sy traa ry heet.


NO COMMENT ON SAFETY AT SELLAFIELD
The authorities at the Cumbrian re-processing plant are reassuring the public about anti-terrorist measures at the site.

Ny lughtyn-reill ec Sellafield, yn ynnyd aa-heeley çheshveanagh ayns Cumbria, t’ad shirrey cur cree da’n theay mychione ny reddyn ta jeant ec yn ynnyd atçhimeyryn y lhiettal. Agh peiagh erbee ec Sellafield, ny peiagh erbee ayns Reiltys y Reeriaght Unnaneyssit, cha jean ad gra veg mychione ny t’er ve jeant neayr’s y chied laa jeig jeh Mean Fouyir daa veeilley as nane, ny neayr’s haink eh dy ve baghtal dy beagh caggey syn Earack.
Ta sleih cur geill noa da’n tauçhys jeh ynnydyn çheshveanagh neayr’s haink imraa magh mychione sauçhys ec ynnyd ayns Essex. Çhaghteryn veih Sellafield, t’ad gra dy vel lught Sellafield freayll rick er sauçhys car y traa, as ta caghlaaghyn er nyn yannoo kyndagh rish baggyrt erbee t’ad coontey dy ve ayn. Agh t’ad gra nagh vod ad loayrt mychione reddyn dy myn, er y fa dy noddagh eer shen brishey shickyrys.
Ta Oik Shickyrys Çheshveanagh Theayagh (Office of Civil Nuclear Security) cur ny conaantyn shegin da’n chiedoonee (licensee) y chooilleeney. She Connaghyn Çheshveanagh Goaldagh (British Nuclear Fuels) y kiedoonee ec Sellafield. Dooyrt peiagh veih’n Oik nagh nee polasee-reiltys eh dy loayrt mychione reaghyssyn-shickyrys.


International recognition for Manx Gaelic

Last Friday it was announced that the Isle of Man Government had agreed to extend the European Charter for Regional or Minority Languages to the Island. This Charter is organised by the Council of Europe.
In a statement from the Chief Minister’s Office, the Manx Government confirmed that it recognises the value of Manx Gaelic and that the language should be protected and promoted as ‘an essential feature of the Island’s culture and heritage’. This is also in line with the Government’s plan for 2003 to 2006, which aims to promote the national identity of the Isle of Man.


Naight Radio Vannin 26.2.03

FIREWORKS BILL
The Member of the House of Keys responsible for the Fireworks Bill is welcoming the support given by the House of Keys.

Alex Downie, yn oltey jeh’n Chiare as Feed ta freggyrtagh son Billey ny Çhentagyn, t’eh cur oltaghey da’n phohlldal t’eh geddyn veih’n Chiare as Feed ec y cheim-oltyn (clauses stage). Mainshtyr Downie, yn oltey son Doolish Heear, t’eh gra dy row yn slattys er ny niartaghey ec lhiasaghyn (amendments) coardit ec y Chiare as Feed bentyn rish paart dy chooishyn. T’eh jeeaghyn roish gys y traa vees ny treealtyssyn nyn leigh.
Cha nel oyr imnea erbee ayn da sleih ta goaill ymmyd jeh çhentagyn er aght freggyrtagh, ta Mainshtyr Downie gra. Agh adsyn ta gaghtey dy meereggyrtagh, bee ad er nyn gerraghey dy trome.
Ta Mainshtyr Downie jeant booiagh ec y phohlldal t’eh geddyn veih mynchreckeyderyn. Foddee sleih çhentagyn y chionnaghey as ad y lhiggey myr dy cliaghtagh ayns lhing daa hiaghtin mygeayrt y mysh Oie ny Çheinjeanyn.


HEALTH COMMITTEE UNHAPPY WITH DHSS VOTING PLANS
A new consultative committee is weighed against the medical profession, according to a Member of the House of Keys.

Ta bing-choyrlee noa neugheynlagh (undemocratic), laadit noi’n gherrym-lhee, as kiaddit dy ve ayns foayr jeh Rheynn Slaynt as Shickyrys y Theay, coardail rish David Cannan, yn oltey jeh’n Chiare as Feed son Maayl.
Hirr sleih ass gerrym-lhee yn Ellan er Mainshtyr Cannan eh dy chur faaue da Tinvaal dy lhisagh ad cur sheear resooney mychione Bing-Choyrlee ny Shirveishyn Slaynt gys veagh tooilley coyrle er ny geddyn.
Ta sleih gaccan er y fa dy noddagh olteynyn jeh’n Ving nagh vel ass y gherrym-lhee, dy noddagh ad lhiettal votyn sy Ving, as dy nee Coonseil ny Shirveishee veagh genmys yn Caairliagh.
Ayns y jerrey, hug lhiasaghey orroosyn ta goaill ayrn sy chooish dy ronsaghey yn aght vees y Ving er ny kiaddey. Y Shirveishagh-Slaynt, Clare y Christeen, t’ee gra dy vod y daa heu gobbraghey ry cheilley dy mie, ga dy vel Mainshtyr Cannan drogh-ouryssagh.


CALL FOR CAR PARK IN RAMSEY
Ramsey Commissioners want to develop the Manx Electric Railway site in the town for a multi-storey car park.

Ta Barrantee Rhumsaa geearree lhiasaghey ynnyd Raad-Yiarn Lectragh Vannin ayns y valley myr pairk-ghleashtan yl-laareagh. Ta’n lught-reill ynnydagh coontey shoh myr ayrn jeh co-strateysh-arraghey foddey-çharrymagh (long-term integrated transport strategy) vees kiarail cur sthap er Rhumsaa goll sheese y liargagh ny smoo, as tayrn stiagh dellal, kionneyderyn, cummaltee as keayrtee.
Ta ynnyd Raad-Yiarn Lectragh Vannin er ny reih myr yn ynnyd share. T’ad jerkal geddyn cooney argidoil veih’n Rheynn Arraghey as kied veih Rheynn Turrysid as Soccar s’lesh paart jeh’n ynnyd.
Eieyn elley cour lhiasaghey skeymyn-pairkal, t’ad goaill stiagh mooadaghey cryssyn-jysk (disc zones) as shirrey argid son pairkal giare-çharrymagh as foddey-çharrymagh ersooyl veih straiddyn. Foddee dy beagh pairkal giare-çharrymagh nastee ny neugheyr.
Veagh ad geeck son pairk-ghleashtan yl-laareagh liorish boodeeys theayagh-preevaadjagh (public-private partnership), ny liorish copharteeys lesh y Reiltys.


HOUSE PRICES CONTINUE TO RISE
Manx estate agents say there is no sign of housing prices coming down.

Cha nel monney (sign) ayn dy vel ny priosyn jeh thieyn goll sheese, coardail rish jantee-hallooin ayns Mannin. Ayns y Reeriaght Unnaneyssit, ta skeealyn goll mygeayrt dy vel y mooadaghey jeh priosyn thieyn goll er leodaghey nish. Agh Stiureyder Black Grace Cowley, Nick Cooper, t’eh gra nagh vel shen taghyrt ayns Mannin.
Ayns buill ennagh syn Ellan, ta foast thieyn ta costal ny sloo na thieyn ayns buill elley, as ta shen soilshaghey nagh vel y margey baiht. As, kyndagh rish speeideilys y tarmaynys, ta foast sleih dy liooar ayn oddys fordrail kionnaghey ny thieyn s’costallee.
Ta Mainshtyr Cooper gra dy vel feanish ayn foast dy vel sleih coontey thieyn dy ve nyn ynesteeaghtyn (investments) mie syn ynnyd jeh reddyn dy chummal ayn nyn lomarcan.


St Matthew and St Matthias

In Manx, ‘Mian’ means both ‘Matthew’ and ‘Matthias’. 24th February is the Feast Day of St Matthias, or Laa’l Mian in Manx.
21st September is the Feast Day of St Matthew - Laa’l Mian again in Manx.
There’s a saying that covers both saints’ days:
‘Laa’l Mian carragh.
Skaayn arroo
Syn ’ouyr, as marroo
Ny eayin syn arragh’.

‘Scurvy Feast Day of Mian.
Blowing the corn down
In the autumn, and killing
The lambs in the spring.’

More unlucky saints’ days!


Naight Radio Vannin 5.3.03

CHIEF MINISTER ‘DISAPPOINTED’ AT FIRST ELECTION
Both the Health Minister and the Minister for Local Government received just ten votes in an election for the Legislative Council.

Ta’n Ard-Hirveishagh, Richard Corkill, er ngoaill rish dy vel eh mollit er y fa nagh row yn daa hirveishagh echey speeideilagh sy reihys sy Choonseil Slattyssagh jea. Y Shirveishagh Slaynt, Clare y Christeen, as y Shirveishagh Reiltys Ynnydagh, Pam Crowe, cha dooar ad agh jeih votyn y pheesh, tree ny sloo na va ymmyrçhagh.
Oltey jeh’n Chiare as Feed son Rhumsaa, Leonard Singer, as Eddie Lowey, oltey jeh’n Choonseil Slattyssagh, v’ad speeideilagh sy reihys. Ta shen faagail daa hoiag dy ve lhieent yn çhiaghtin shoh çheet, as cur er fo-reihys dy ve reaghit ayns Rhumsaa son y Kiare as Feed. Cha row Ray Kniveton, oltey jeh’n Choonseil Slattyssagh, speeideilagh noadyr.
Ta Richard Corkill gra nagh vel y chooish harrish er chor erbee, as tooilley reihyssyn ayn tra vees y Kiare as Feed çhaglym reesht yn çhiaghtin shoh çheet.
T’eh gra dy lajer nagh vel ny votyn soilshaghey nagh vel barrant ayn er e hirveishee.
Choud as shoh, cha nel agh un pheiagh er chur magh dy vel ee kiarail shassoo son soiag Leonard Singer sy Chiare as Feed. She Anne Craine y peiagh shen.


FUNERAL FOR THREE TEENAGERS TODAY
The joint funeral of the three teenagers who died in a car crash near Peel was held today.
Co-hirveish ny merriu son ny tree jeigeyryn hooar baase ayns smoash-gleashtan er gerrey da Purt ny h-Inshey ec jerrey yn vee shoh chaie, hie ee goll er cummal jiu.
Yn çhirveish, son Benjeman Jones, Adam Pope as Anthony Shaw, ren ee goaill toshiaght ec lieh-oor lurg munlaa ec Keeill Noo Shorys ayns Doolish.
Lurg y smoash, ren taghyrt er y nuyoo laa jeig jeh Toshiaght Arree, dooyrt lughtyn-thie ny tree deiney aegey dy row yn cree jeh gagh fer jeu ayns creeaghyn ny fir elley. As, er y fa dy dooar ad baase ry cheilley, veagh ad laccal nyn shirveish ry cheilley myrgeddin.
Dooyrt y toshiagh joarey, Michael Moyle, dy row yn drogh-haghyrt nane jeh ny doo-skeeallyn smessey syn Ellan rish kuse dy vleeantyn.


MANX RIVERS IMPROVEMENT ASSOCIATION REMAINS CONFIDENT
The Manx Rivers Improvement Association says its work is still crucial despite IRIS.

Yn Çheshaght cour Sharaghey Awinyn Vannin, t’ee gra dy vel yn obbyr eck lane femoil foast son eeastyn as beiyn elley ta croghey er awinyn yn Ellan, ga dy bee anchaslys jeant ec skeym IRIS. Ec çhaglym cadjin bleinoil yn çheshaght, ren y caairliagh, Keith Harrison, goaill rish nagh row ad er hroggal argid dy speeideilagh sy vlein shoh chaie. Agh v’eh foast shickyr dy beagh ventyryn noa cur lhieu speeideilys.
Dooyrt Mainshtyr Harrison dy vel obbyr yn çheshaght echey foast lane ymmyrçhagh, ga dy jean y skeym-sornaigys feiy yn Ellan leodaghey sollaghey dy mooar. Myr sampleyr, ta’n çheshaght coadey braddanyn noi eeastagh anleighalagh. As t’ad jannoo studeyrys sheansagh (scientific) er sollaghey ayns awin Sulby. T’eh treishteil dy vel yn Çheshaght cour Sharaghey Awinyn Vannin cleayney (influencing) yn aght vees ad jeeaghyn mysh awinyn sy traa ry heet.


GOOD NEWS FOR AMBULANCE SERVICE
A survey by the Island’s ambulance service has given a satisfaction rating of 94%.

Ayns creearey jeh surransee er ny yannoo liorish shirveish charbid-lheihys yn Ellan, ta kiare feed as kiare-jeig sy cheead jeh ny surransee gra dy vel ad jeant booiagh ec y çhirveish. As ta bunnys tree feed as jeih sy cheead gra dy vel y çhirveish mie er bashtal.
Va’n creearey bentyn rish surransee ta reaghey arraghey ayns carbid-lheihys as cha nee roosyn ren shirrey carbyd-lheihys ayns geyre-ghaue. Bee creearey elley er ny yannoo son ocsyn ny s’anmagh sy vlein.
Hoilshee yn feyshtane (questionnaire) dy row boayl ny ghaa ayn raad va doilleeid ec sleih. Hannah, ta’n çhirveish er ngoaill toshiaght dy ghellal rish shoh liorish kionnaghey daa charbyd noa.
Foddee dy bee skimmee-carbid-lheihys ceau cowraghyn-enney (identity badges) sy traa ry heet, ga dy vel kaartyn-enney (ID cards) oc hannah.

Smoke abatement in the 1830’s.

You tend to think of smoke abatement as a recent activity. However, I came across an act of Tynwald from about 1835, entirely written in Manx, which required people operating furnaces, boilers and so on to make each one of these to ‘burn and destroy its own smoke’ (‘lostey as stroie yn jaagh lesh hene’) to cut down emissions. Sensibly, people would only be fined (pretty heavily) if they hadn’t make reasonable efforts to carry out this near impossible order.
Topical stuff with all the fuss about waste management.


Naight Radio Vannin 12.3.03

CONFERENCE ON SELLAFIELD DISCHARGES TO BE HELD
The conference will discuss the effects of technetium-99 discharges.

Y vee shoh çheet, hed co-whaiyl er cummal dy resooney ny h-eiyrtyssyn jeh lhiggey çheghnaiçhum-nuyad-nuy stiagh sy cheayn veih Sellafield. Adsyn vees goaill ayrn sy cho-whaiyl, bee ad BNFL, yn Undinys-Çhymmyltaght Bellona, as çhaghteryn veih ellanyn-eeastee ayns twoaie Norlann as reiltys Norlann. Cha nel fys ry gheddyn foast mychione çhaghteryn veih’n Reeriaght Unnaneyssit.
Ta reiltyssyn Vannin as Nerin er ve caggey noi lhiggey çheghnaiçhum-nuyad-nuy stiagh sy cheayn rish tammylt liauyr.
Coardail rish fockley liorish Shirveishagh Çhymmyltaght y Reeriaght Unnaneyssit, Michael Meacher, Mee ny Nollick shoh chaie, cha bee ad cur tooilley orçh lesh goul-roorid injil sy cheayn ayns ny meeghyn ry heet. T’ad smooinaghtyn er aghtyn elley dy gheddyn rey rish.


QUINE CALLS FOR MORE SCRUTINY
Ayr MHK Edgar Quine claims huge sums of public money have been wasted.

Ayns imraa (report) vees currit da Tinvaal yn çhiaghtin shoh çheet, yn oltey jeh’n Chiare as Feed son Ayre, Edgar Quine, t’eh gra dy row symyn mooarey dy h-argid er nyn yummal, kyndagh rish genney ronsaght chiart.
Ta’n imraa ny aareayrtys (review) liorish Bing Shassoo Baarail as Coontyssyn Theayagh, enmyssit dy cadjin myr Bing Coontyssyn Theayagh. Ta faaue ayn dy lhisagh y Choonseil Slattyssagh scrutaghey ny fo-lattyssyn (secondary legislation) as cooishyn veih’n Unnaneys Oarpagh.
Ta Mainshtyr Quine goaill rish dy vel yn imraa soilshaghey yn aght ren Bing Coontyssyn Theayagh failleil sy traa hie shaghey, agh t’eh gra dy ren shen taghyrt kyndagh rish genney argid. Ta Mainshtyr Quine ny oltey jeh’n Ving rish ymmodee bleeantyn.
T’eh gra nagh vel eh jerkal dy bee yn Ellan scrutaghey cooishyn myr shoh cho jeean as adsyn sy Reeriaght Unnaneyssit. Agh ny yei shen as ooilley, t’eh credjal dy vel feme er tooilley dy ve jeant dy choadey yn theay as yn argid oc.


MHK QUESTIONS RAISING THE HEIGHT OF WRIGHTS PIT EAST
Edgar Quine says a special inquiry should be set up.

Yn oltey jeh’n Chiare as Feed son Ayre, Edgar Quine, t’eh gra dy lhisagh brialtys er lheh er ve currit er bun dy ronsaghey yn yeearreydys dy hroggal yn yrjid jeh Clash Hiar Wright. T’eh gra nagh lhisagh cooish jeh scansh ashoonagh croghey er briwnys scruteyr. Ta yeearreydys er ny chur stiagh dy hroggal y chlash liorish daa veadar dy lieh (2.5 m) dy lhiggey da ymmyd ve jeant jee foastagh, derrey vees y losteyder ec Cronk Bwoaill Rhennee goaill toshiaght d’obbraghey.
Ta Mainshtyr Quine gra dy jean shen caghlaa Clash Wright veih ‘lhieeney thalloo’ gys ‘troggal thalloo’. Cha nel eh cooilleeney femeyn y laa jiu, t’eh gra.
Noght, bee Pam Crowe, y Shirveishagh Reiltys Ynnydagh, resooney yn chooish jeh ny shirveishyn cour çhymsaghey orçh as ny keeshyn ynnydagh (ny raaytyn) ec çhaglym son ooilley ny lughtyn-reill ynnydagh syn Ellan.


DOUGLAS LIBRARY IS MOVING
Douglas Library will transfer from Ridgeway Street to Victoria Street.

Veih toshiaght yn çhiaghtin shoh çheet, nee skimmee Lioarlann Ghoolish goaill toshiaght dy gharraghey e stoo-lhaih gys troggal noa er lheh ta kiarit jee.
Hed daeed meeilley (40,000) lioar er garraghey veih’n çhenn troggal ayns Straid Ridgeway gys y thie noa ayns Straid Varriaght. Ta Lioarlann Ghoolish ayns Straid Ridgeway rish ny smoo na keead blein.
She obbyr vooar vees ayn, ta’n lioarlannee John Bowring gra.


CANNAN WELCOMES SUPPORT FOR HIS PRVATE MEMBERS BILL
The bill is to restrict development in Kirk Michael and help reduce coastal erosion.

Yn oltey jeh’n Chiare as Feed son Skylley Maayl, David Cannan, t’eh goltaghey yn pohlldal hooar eh sy Chiare as Feed jea as eshyn cur lesh stiagh billey dy lhiettal lhiasaghey ayns Skylley Maayl, as leodaghey yn aght ta’n keayn shuilgey yn thalloo ayns shen.
T’eh laccal thalloo ta faggys da oirr yn eaynin dy ve ny ard coadit (protected area).
As t’eh geearree gobbraghey marish y Rheynn Arraghey dy chur lesh stiagh slattys ry hoi coadey yn slyst-marrey ayns shen. Ta Mainshtyr Cannan gra dy vel eh lane shickyr dy nee leigh noa yn ynrican aght yn balley beg y choadey sy traa ry heet.


Naight Radio Vannin 19.3.03

IMPORTANT MEETING OF EUROPEAN FINANCE MINISTERS
The ministers will be discussing issues of significance to offshore finance centres.

Ta shirveishee argidoil Oarpagh çhaglym jiu, as bee ad resooney cooishyn bentyn rish ynnydyn argidoil mooie, goll rish Mannin. Oddagh ny shirveishee jannoo briwnyssyn mychione yn Oardagh Keesh cour Sproagyn (Savings Tax Directive) as yn Coad-stiuree (Code of Conduct). Ec y çhaglym jerrinagh, lhiet yn Iddaal coardailys mychione yn Oardagh, as hug ee er shen dy ve currit sheear gys çhaglym yn laa jiu.
Ayns Mannin, t’ad gra nagh jean ad briwnys erbee mychione coonrey fysseree derrey vees yn Oardagh Keesh cour Sproagyn coardit.


BY-ELECTION IN RUSHEN
The election of Pam Crowe to the Legislative Council means there will be a by-election in Rushen.

Ta’n Shirveishagh Reiltys Ynnydagh, Pam Crowe, er ny reih myr oltey jeh’n Choonseil Slattyssagh. Er yn oyr shen, hed fo-reihys er cummal ayns Rosien.
She rheynn-reihys (constituency) tree soiagyn t’ayn. Syn ard-reihys jerrinagh, ayns Mee Houney, daa veeilley as nane, haink Benainshtyr Crowe sy trass ynnyd. Cha dooar ee agh un vote jeig ny smoo na’n coontysseyr Andy Roy.
Ta Mainshtyr Roy gra nagh bee eh shassoo yn keayrt shoh, kyndagh rish cooishyn lught-thie, as er y fa dy vel yn traa cooie er ngoll shaghey. T’eh gra dy lhisagh Rosien - as yn Ellan - ve shirrey sorçh er lheh dy yeearreyder.
She Philip Crellin as John Gill va ny yeearreyderyn elley syn ard-reihys sy vlein daa veeilley as nane.


REFORM FOR LEGISLATIVE COUNCIL?
The continuing process of trying to fill the vacant seats in the Legislative Council has re-introduced the issue of reform.

T’ad foast prowal dy lhieeney ny soiagyn follym sy Choonseil Slattyssagh, as ta shen er n-aavioghey yn chooish jeh aachummey yn çhamyr heose.
Y vote jea, va shen y nah eab dy lhieeney ny soiagyn follym. She yn Shirveishagh Slaynt, Clare y Christeen, as yn Shirveishagh Reiltys Ynnydagh, Pam Crowe, va speeideilagh. Nee ad prowal son y trass cheayrt y toiag s’jerree y lhieeney er y chied laa jeh Mee Averil. Oltey jeh’n Chiare as Feed son Rosien, John Rimington, ren cur roish Benainshtyr y Christeen, t’eh gra dy vel caghlaaghyn mooarey çheet, foddee. Agh ec y traa t’ayn, by vie leshyn dy beagh olteynyn jeh’n Chiare as Feed goaill ymmyd jeh ny votyn oc syn ynnyd jeh lhiggey da’n chooish goll dy dree.
Dinsh Benainshtyr Crowe da David Callister veih Radio Vannin dy nee currym olteynyn y Chiare as Feed y vunraght t’ayn nish y chummal seose derrey vees bunraght elley ayn.


WHEY DISPOSAL
The Milk Marketing Association was told that the disposal of whey would not be possible through the IRIS scheme.

V’eh inshit da Sheshaght Margeeys Bainney ny smoo na kiare bleeaney er dy henney nagh dod ad geddyn rey rish meaig liorish skeym IRIS. Loayreyder y Chiare as Feed, Tony Brown, dinsh eh da Tinvaal dy ren eh coyrlaghey da’n Çheshaght cooney argidoil y hirrey bentyn rish y chostys jeh geddyn rey rish meaig.
Va Tinvaal resooney toyrtys da’n Çheshaght jeh shiaght cheead meeilley punt, dy eeck son tree sailanyn dy ghoaill seose gys queig cheead as daeed meadar kern-thummidagh dy veaig, fo-hroar (by-product) veih jannoo caashey.
Cheayll olteynyn Tinvaal dy begin geddyn rish y veaig sy cheayn sy jerrey, trooid piob ayns Baie Ghoolish.
Oddagh ad yn veaig y chaghlaa gys poodyr, oddagh goll er creck. Agh y Shirveishagh Eirinys, John Rimington, dooyrt eh dy jinnagh skeym bunargidagh y lheid y yannoo, dy jinnagh shen costal shiaght millioon dy lieh dy phuntyn. Cha beagh shen tarmaynagh.
Choard Tinvaal dy cheau ny shiaght cheead meeilley punt.


St Patrick’s Day

St Patrick features prominently in Manx traditions and folklore.
A saying connected with St Patrick’s Day is:
‘Laa’l Parick arree, yn dow gys e staik as y dooinney gys e lhiabbee’ - ‘St Patrick’s Feast Day in the spring, the ox to its stake and the man to his bed.’
On St Patrick’s Day when it got dark, the ox was supposed to be tied to the stake and the man was supposed to go to bed - it was supper at dark and then to bed for both of them. No light was expected to be lit after St Patrick’s Day.


Naight Radio Vannin 26.3.03

HOTELS STILL COUNTING COST OF FIRE
The owners of four guest-houses are trying to rebuild their businesses.

As ad scughey ersooyl ny remladyn jeh’n thie-oast Delamere lurg yn aile ren stroie eh, ta ny shellooderyn jeh ny kiare thieyn-goaldee er yn çheu elley jeh’n raad prowal dy aa-hroggal ny dellalyn oc.
Y Mereside, Rosslyn, Ainsdale as Castlemount, hie ad er jeeylley dy mooar tra lheim yn aile gys ny loutyn oc, moghey er yn chiarroo laa jeig jeh’n vee shoh.
Dy jeeragh lurg yn aile, va obbyr ny shirveishyn geyre-ghaue er ny moylley dy mooar. Nish, t’ad cur booise da troggeyderyn, lectreyryn, thieyn-nieeaghyn as fir-dellal sy nabooys ren cur cooney myrgeddin.
Shellooder y Mereside, Paul Simpson, t’eh gra dy bee eh gaa-hroggal son queig mee, foddee, agh t’eh slane kiarit y dellal echey ’osley reesht. Va paart jeh clea y Mereside er ny ghoaill ersooyl cour sauçhys.


FATAL ACCIDENT - APPEAL FOR WITNESSES
A motorcyclist and mother of four was killed.

Peiagh erbee va çheu-mooie jeh’n thie-lhionney ec Creg ny Baa Jedoonee, eddyr nane er y chlag as kerroo lurg nane syn ’astyr, ta ny meoiryn-shee guee orroo ad dy loayrt roo.
Ta shoh bentyn rish drogh-haghyrt ec Corneil Hillberry ayns Skyll Connaghyn. Va Dianne Louise Chreseson, ben roar-bree as moir jeh kiare paitçhyn, er ny marroo sy drogh-haghyrt.
Peiagh erbee as fys oc lhisagh ad çhellvaney Ard-Stashoon ny Meoiryn-Shee er 631212.


BILL PROPOSES INTRODUCING A POPULARLY ELECTED LEGISLATIVE COUNCIL
Edgar Quine’s bill is due to receive its second reading next week.

Billey Oltey Preevaadjagh Edgar Quine, oltey yn Chiare as Feed son Ayre, hed eh er lhaih son y nah cheayrt yn çhiaghtin shoh çheet. Ta’n Billey treeal coonseil lesh hoght olteynyn, goll er reih ec y theay son queig bleeaney, lesh currymyn screeut sheese ayns docamad leighdaragh.
Ta Mainshtyr Quine gra dy nee coonseil dy steateyryn shinney veagh ayn, currit da scrutaghey cooishyn. Agh t’eh gra neesht nagh jed y Billey trooid Tinvaal dy h-aashagh.


FRIENDS OF THE EARTH CALL FOR BETTER BUILDING REGULATIONS
The environmental group wants better use of insulation and positioning of houses.

Coardail rish banglane Vannin jeh Caarjyn y Teihll, ta feme er annaghyn-troggal share dy chur er thieyn croghey ny sloo er connaghyn-fossyl. Ta’n possan çhymmyltaghtoil shirrey caghlaaghyn-plannal dy ghoaill ymmyd share jeh çhiass-jeenaght as soiaghey (positioning) dy leodaghey yn feme dy hiow thieyn.
Ta sleih yn phossan fockley nyn imnea as Ynnyd y Reeriaght Unnaneyssit cour Faaishnys-Emshyr cur faaue dy nod sleih leodaghey ny gassyn thieyn-gless ta goll er livrey syn aer.
By vie lesh Caarjyn y Teihll dy beagh y kiaddey (design) jeh thieyn unnaneagh as steatyn dy hieyn goll er sharaghey, as dy beagh sleih sy jeadys-troggal goll er traenal ny share ayns fondid-bree (energy efficiency)


CONTAMINATED SOIL EXPORTED TO GERMAN STERILIZATION PLANT
It would have been preferable to have dealt with the soil in the Island, but the technology is not available here.

Meeilley dy lieh (1,500) dy hunnaghyn dy h-ooir sollit veih Stashoon Pooar Phoyll Roish, t’eh dy ve currit gys y Ghermaan ny s’anmagh sy çhiaghtin. Ta seyraad (facility) oc hoal ry hoi jannoo yn ooir shast.
Stiureyder Shirveishyn Çhaghnyssagh son Lught-Reill Lectraghys Manninagh, Aston Lewis, t’eh gra dy bare dellal rish yn ooir sollit ayns Mannin, agh cha nel y çhaghnoaylleeaght ry gheddyn ayns shoh.
T’eh gra dy vel y sollaghey myr fo-hroar dooghyssagh veih’n çhenn stashoon-diesel.


Mary’s Feast Day of the Whisper

25th March in Manx is Laa’l Moirrey ny Sannish - Mary’s Feast Day of the Whisper, or the Annunciation - the announcement of the incarnation by the Angel Gabriel to the Virgin Mary.
This day was also known in Manx as Çhaghter da’n Voidyn Moirrey - Messenger to the Virgin Mary.
Religious terms in Manx possibly give a hint that the Manx themselves were relaxed about the Reformation, which some have said took 200 years to carry out in the Isle of Man!


Naight Radio Vannin 2.4.03

POSSIBILITY OF A 32 MEMBER ELECTED TYNWALD TO BE RE-EXAMINED
The House of Keys has accepted the principle that the Legislative Council should be popularly elected.

Ta’n Kiare as Feed er hoiaghey jeh’n phrinsabyl dy lhisagh y Choonseil Slattyssagh goll er reih ec y theay. Billey Oltey Preevaadjagh Edgar Quine, yn oltey jeh’n Chiare as Feed son Ayre, v’eh er ny choardail ec y nah lhaih liorish kiare voteyn jeig noi hoght.
Agh, gyn jerkalys, Steve Rodan, yn oltey jeh’n Chiare as Feed son Garff, hooar eh kied dy chur er e hoshiaght lhiasaghey yinnagh cur erash y treealtys, my vees eh coardit, dy lhisagh y theay reih gagh oltey ass daa-yeig as feed jeu ayns Tinvaal.
Dy firrinagh, yinnagh treealtys Vainshtyr Rodan cur treealtys jeant sy toshiaght ec Victor Kneale, eaar-oltey jeh’n Chiare as Feed son Doolish Heear, ayns ynnyd villey Vainshtyr Quine. Y treealtys haink veih Victor Kneale hoshiaght, v’eh er ny cheau magh ec y Chiare as Feed tra v’eh goll er leeideil trooid Tinvaal liorish Geoff Cannell, eear-oltey son Kione Droghad.
Dooyrt Allan Bell, oltey jeh’n Chiare as Feed son Rhumsaa, dy jinnagh cur lesh stiagh billey elley myr lhiasaghey, dy jinnagh eh çhyndaa cooishyn bunraghtoil bun ry skyn. Cha ren y lheid rieau taghyrt roïe, dooyrt eh.
Ny sodjey, hirr kuse dy lhiasaghyn er billey Vainshtyr Quine goll gys bing. Myr shen, hie bing lesh queig olteynyn er cur er bun. Ver y ving magh ny briwnyssyn eck roish Mee Averil ayns daa veeilley as kiare.
Lhiasaghey Vainshtyr Rodan, leeidagh shen gys un reihys dy chooilley wheig bleeaney, ayns yn ynnyd jeh reihyssyn scarrit son y Kiare as Feed as y Choonseil Slattyssagh. T’eh gra dy vel y prinsabyl undinagh feer scanshoil. Ayns deynlaght (democracy), sleih ayns reiltys as pooar oc, lhisagh ad goll er reih ec y theay.
Ta Mainshtyr Rodan gra dy derragh y lhiasaghey paart dy leighoilid deynlagh (democratic legitimacy) da’n Choonseil Slattyssagh. Yinnagh eh shaghney streeu as çhennid eddyr y daa vanglane.


RAMSEY HEALTHCARE ROW DEVELOPS
Leonard Singer says the Health Minister should either resign or find herself forced from office.

Leonard Singer, eear-oltey jeh’n Chiare as Feed son Rhumsaa as oltey jeh’n Choonseil Slattyssagh nish, t’eh gra dy lhisagh y Shirveishagh Slaynt girree ass oik, er nonney lhisagh ee ve currit ass oik kyndagh rish caghlaaghyn ayns shirveishyn-slaynt fud ny h-oie ayns y twoaie.
Agh y Shirveishagh Slaynt, Clare y Christeen, oltey jeh’n Choonseil Slattyssagh, t’ee gra dy vel y doilleeid er jeet rish er y fa dy vel fir-lhee ayns y twoaie er nobbal dy obbraghey ayns yn oie arragh.


REACTIONS TO PLANS FOR PORT ST MARY TOWN HALL
The Friends of Port St Mary Town Hall want more information about future plans for the building.

Caarjyn Halley Balley Phurt le Moirrey, t’ad geearree tooilley fys veih Barrantee Phurt le Moirrey mychione ny plannyn oc son y troggal sy traa ry heet.
Loayrtagh son ny Caarjyn, Seán Lynch, t’eh gra nagh vel ad noi yn eie jeh troggal noa. Agh t’ad shirrey barrantys dy bee lheid y halley foast ry gheddyn sy traa ry heet.


CIVIL SERVICE ‘HEAD-HUNTING’
The Council of Ministers is confirming its support for plans to increase the appeal to graduates of entering the Civil Service.

Ta Coonseil ny Shirveishee feeraghey pohlldal plannyn ry hoi cleayney tooilley keimeeyn stiagh sy Çhirveish Shivoil. As eshyn cur freggyrt screeut rish feysht va currit er y voayrd ec David Cannan, oltey jeh’n Chiare as Feed son Maayl, ta’n Ard-Hirveishagh Richard Corkill gra dy vel ram obbyr jeant hannah ec yn Oik Skimmee (Personnel Office). T’ad kiarail cur er yn Çhirveish Shivoil dy ve smoo tayrnagh da sleih ta laccal coorse-kiartey breeoil.
Chammah as shen, ta Mainshtyr Corkill soilshaghey dy vel Coonseil ny Shirveishee pohlldal as goaill rish y scansh jeh traenal as lhiasaghey skimmee ec Colleish Shirveish Shivoil y Reeriaght Unnaneyssit ec Sunningdale ayns Sostyn.


April Fools and the Tarroo-Ushtey

Making April Fools does not seem to have been a particularly Manx custom, but the custom was certainly well established by the 19th century. For instance, on 1st April 1859 somebody reported that there was a tarroo-ushtey (a water-bull - a terrifying supernatural animal) in a field at Ballure. Hundreds of people went out from Ramsey to see the tarroo-ushtey, but were disappointed - there was nothing there.


Naight Radio Vannin 16.4.03

RENEWED IRISH-MANX FRIENDSHIP
The Irish Taoiseach, Bertie Ahern, was guest speaker at the Island’s Euroclub.

Coardail rish yn Ard-Shirveishagh, va kianglaghyn eddyr Mannin as Nerin er nyn niartaghey tra hug Taoiseach Nerin shilley er Mannin Jelune. Loayr Bertie Ahern myr cuirreydagh ec Euroclub yn Ellan as eh resooney kianglaghyn Nerin lesh yn Unnaneys Oarpagh.
Tra v’eh ayns Mannin, loayr Mainshtyr Ahern rish sleih ayns Reiltys Vannin mychione cooishyn ta’n daa heer boirit mychione, goaill stiagh Sellafield as laadyn çheshveanagh ayns Mooir Vannin. Dooyrt Mainshtyr Ahern dy row eh jeeaghyn roish gys co-obbraghey sodjey marish Reiltys Vannin bentyn rish lheid ny cooishyn shoh.
Loayr yn Ard-Shirveishagh Richard Corkill mychione ny kianglaghyn cultooroil lajer eddyr Nerin as Mann as nyn go-eiraght Ghaelagh. Dooyrt Mainshtyr Corkill myrgeddin dy hoilshee yn cheayrt (visit) yn feeuid jeh’n Choonseil Goaldagh-Yernagh, va currit er bun queig bleeaney er dy henney myr ayrn jeh Coardail Jeheiney Caisht.


BERTIE AHERN REMINDED OF MANX-IRISH CULTURAL LINKS
Eamon de Valera’s visit in 1947 led to the recording of native speakers of Manx.

Ny kianglaghyn cultooroil eddyr Mannin as Nerin, v’ad currit ayns cooinaghtyn Bertie Ahern, Taoiseach Nerin, tra hug eh shilley beg er Mannin Jelune. Va Mainshtyr Ahern ec Cashtal Rosien tra dinsh ad da dy dug Taoiseach elley shilley er Mannin roish shoh, as dy reagh eshyn dy jinnagh ny coraaghyn jeh ny shenn loayrtee dooghyssagh Gaelgagh s’jerree goll er recortyssey.
Sy vlein nuy cheead jeig shiaght as daeed, hug Eamon de Valera - nane jeh fir vooarey pholitickaght Nerin syn eedoo eash - hug eh shilley er Mannin. Hoilshee eh anaase er (mastey reddyn elley) yn Ghaelg, as heb eh yn ymmyd jeh unnid-recortyssee gleashagh (mobile recording unit) Commishoon Beeal-Arrish Nerin.
Haink yn unnid noal sy vlein nuy cheead jeig hoght as daeed. Cha row yn turrys yindyssagh - begin da’n unnid goll er y lout-eaghtyr sinshley jeh lhong-ollee, as begin da’n unnid goll er glenney roish my dod ad goaill toshiaght dy obbraghey.
Haink ny recortyssyn dy ve feer leaghar, as ec y traa t’ayn t’ad goll er bun-earrooaghey (being digitised) ec Raidio Teilifís Éireann. Ta treisht ayn dy jean Eiraght Ashoonagh Vannin ny recortyssyn y chur magh myr jysk cumir (CD) ny s’anmagh sy vlein.
Y Taoiseach t’ayn nish, Bertie Ahern, hooar eh cooinaghtane frameit jeh keayrt de Valera myr gioot. Dooyrt Mainshtyr Ahern dy row eh jerkal dy beagh lheid y cho-obbraghey cultooroil messoil shen ayn sy traa ry heet.


RAMSEY TO CREATE CARDBOARD RECYCLING INITIATIVE
Ramsey Commissioners propose shipping cardboard to a recycling plant in the UK.

Ec çhaglym noght, nee Barrantee Rhumsaa resooney cur er bun laare dy haglym as dy aa-choorsal (recycling) pabyr creoi er y twoaie. Ta bunnys shiaght cheead thunney dy phabyr creoi çheet rish ayns Rhumsaa gagh blein. Y treealtys t’ayn, shen dy haglym pabyr creoi dy liooar veih buill-hraghtee (commercial premises) as eisht eh y chur ayns lhong gys mwyllin aa-choorsal sy Reeriaght Unnaneyssit.
My vees y skeym speeideilagh, shegin orçh pabyr creoi y horçhal dy kiart ec ny buill-hraghtee, vees shirrey foays liorish ny costyssyn leodit. As bee yn prios t’ad geeck son y pabyr creoi ec ny mwyljyn aa-choorsal scanshoil.
Ta faaue ayn dy lhisagh ad çhaglym pabyr creoie veih’n twoaie ooilley cooidjagh.


SULBY TREATMENT WORKS CONTRACT AWARDED
The UK firm Earth Tec will build the northern water treatment works.

Ta Lught Reill Ushtey er ghra dy jed ny h-obbraghyn ry hoi glenney ushtey ayns Sulby er troggal liorish Earth Tec, colught veih’n Reeriaght Unnaneyssit. Roish shoh, v’ad kiarail troggal obbraghyn Sulby ec y traa cheddin as obbraghyn ayns Doolish, agh ta obbraghyn Ghoolish er ve currit sheear kyndagh rish obbal arganagh son kied-plannal.
Ta’n conaant feeu daa villioon punt yeig as t’eh reaghit dy ghoaill toshiaght ayns Jerrey Souree. T’ad kiarail cur kione er yn obbyr ayns beggan ny smoo na daa vlein. Reireyder-Shalee son Earth Tec, John Kay, t’eh gra dy vel ad jerkal dy bee Earth Tec goaill ayrn ayns troggal obbraghyn ayns Doolish tra vees fys ayn c’raad vees ny h-obbraghyn soit ayns shen.


Manx surnames: Quilliam

A lot of Manx surnames start with the letters C, K or Q - this comes from the Gaelic for ‘son’, which is ‘mac’. Knock off the ‘m’ and the ‘a’ and you’re left with ‘c’. That’s what happened to ‘Mac William’ (‘Son of William’), which in time became ‘Cwilliam’ or ‘Quilliam’. If we had used Gaelic spelling, all those surnames starting with ‘K’ or ‘Qu’ would have started with ‘C’ - from ‘Mac’.


Naight Radio Vannin 23.4.03

NEW CONSERVATION AREAS FOR UPPER DOUGLAS
Among the issues raised are grants available to owners.

Crooee Rheynn Reiltys Ynnydagh paart dy h-ardjyn-freayltys (conservation areas) ayns Doolish Heose. Ver ad loayrtys-fysseree mychione shoh ayns Keeill ny Nooghyn Ooilley Jeheiney as Jesarn. Yiow ooilley ny cummaltee duillagyn vees cur fys er yn eiyrtys jeh lheid y treealtys.
Mastey ny cooishyn troggit ta ny toyrtyssyn (grants) ry gheddyn son shellooderyn thieyn dy chooney lesh y chostys jeh cummal seose as karraghey thieyn.
She shooylaghanyn Ghoolish va’n chied ard-freayltys. Ec y traa t’ayn, t’ad croo ard-freayltys elley ec Balley Garey (ny Balley Keeill Varkys) .
Ta Rheynn Reiltys Ynnydagh gra dy vel lheid ny h-ardjyn-freayltys shoh ny aght dy reayll as dy lhiasaghey eiraght yn Ellan. T’ad cur cuirrey da’n theay dy chur barelyn mychione ny treealtyssyn roish yn çhiaghtoo laa jeh Mee Boaldyn.


UK FIRM WINS MANX GAS £4 MILLION CONTRACT
The conversion to natural gas is expected to start this summer.

Ta Primeshade, colught veih’n Reeriaght Unnaneyssit, er chosney yn conaant mooar son Gas Vannin dy chaghlaa gys gas dooghyssagh. Ta’n conaant feeu kiare millioon punt. Ta sleih voish Primeshade ayns Mannin hannah jannoo ro-obbyr (preliminary work) as feeraghey sauçhys-gas.
T’ad jerkal dy bee ad caghlaa gys gas dooghyssagh y sourey shoh, trooid Doolish, Kione Droghad, Mwyllin Doo Aah, Crosby as Glion Vian.
Ta Primeshade nane jeh ny colughtyn smoo ta jannoo obbyr-gas as y lheid sy Reeriaght Unnaneyssit.


TOOLS FOR UGANDA
Two full crates of old tools and sewing machines have left for Uganda.

Daa chishtey mooar lane dy henn ghreieyn as greieyn-whaaley hie er çhaglym ec yn ynnyd-orçh sy jiass, t’ad er naagail yn Ellan dy gholl gys Uganda. V’ad currit myr toyrtys da’n çheshaght ghiastyllagh ‘Greieyn son Unnaneys’ ta cur culleeyn da sleih anlheiltagh as schleiyn oc syn Affrick dy chosney saase-beaghee dauesyn hene.
Sy toshiaght, t’ad er chur lesh ny greieyn gys Beeal Feirshtey, boayl vees ad jeant ass y noa roish my jed ad gys Uganda. Nee Bing Cooney Mooie Reiltys Vannin geeck son arraghey ny greieyn gys yn Affrick.
T’ad çhaglym greieyn reesht ec ynnyd-orçh y jiass son kishtey mooar elley. Erskyn ooilley t’ad laccal shenn ghreieyn-whaaley as greieyn ry hoi obbyr-foiee.


LOCAL AUTHORITIES HAVE TO DEVELOP SCHEMES THEMSELVES
The Minister for Local Government is congratulating Ramsey Commissioners for coming up with a cardboard recycling scheme.

Y Shirveishagh son Reiltys Ynnydagh, Pam Crowe, t’ee moylley Barrantee Rhumsaa son kiaddey skeym ry hoi aa-choorsal (recycling) pabyr creoi er y twoaie. Agh t’ee gobbal y faaue nagh dug y Rheynn eck cooney ny coyrle da lught-reill ynnydagh Rhumsaa.
Hug caairliagh Varrantee Rhumsaa faaue dy row treealtys Rhumsaa er jeet rish kyndagh rish genney ventyrys (initiative) veih’n reiltys. Ta Barrantee Rhumsaa kiarail çhaglym pabyr creoi ec ard-ynnyd sorçhal, as cur y pabyr creoi gys y Reeriaght Unnaneyssit dy gholl er aa-choorsal.
Ta Benainshtyr Crowe gra dy vel eh er lughtyn-reill yn Ellan lheid y skeym shoh y chur er bun. T’ee credjal dy bee skeymyn myr shoh foaysagh er aght tarmaynagh as sleih reaghey strateysh Vannin ry hoi geddyn rey rish orçh.


THREE HILLS CHALLENGE
Cars of all sorts will attempt to be the quickest up Creg ny Baa, the Sloc and Lhergy Frissel.

Nee Doolane ny Tree Crink goaill toshiaght mairagh. Shoh immeeaght tree laa as gleashtanyn jeh dy chooilley horçh prowal dy ve y fer smoo tappee goll seose ughteeyn ec Creg ny Baa, y Sloc as Lhargee Frissel. Hed ny raaidyn er dooney ec jeih er y chlag ec Creg ny Baa er y choorse TT Jerdein, ec y Sloc Jeheiney, as ec lhoob gear Rhumsaa er y choorse TT Jesarn.
Agh ny prowallyn-bieauid v’ad kiarail cummal er y raad jeeragh boayl ta’n TT goaill toshiaght as çheet gys jerrey, cha bee ad ayn mleeaney. Va’n Rheynn Turrysid pohlldal ny prowallyn-bieauid, agh va’n Rheynn Arraghey noi oc.


Manx surnames: Bridson

An old Manx surname that doesn’t start with C, K or Q! This is actually an English translation of the Manx Mylvreeshey, which originally came from Mac Guilley Vreeshey - The Son of the Servant of Brigid. The Christian Brigid was said to have been the Abbess at Kildare in the 6th century. She has a parish named after her in the Isle of Man. Stories about the Christian Brigid merged with those about the pagan goddess Brigid, the patron of poets and craftsmen.


Naight Radio Vannin 30.4.03

NO CONSTITUTIONAL BAR TO LEGCO REFORM
David Kermode says there should be no constitutional barrier to reform of the Legislative Council.

Ta David Kermode ny scoillar t’er nyannoo studeyrys er Mannin. Coardail rishyn, cha lhisagh bunraght Vannin lhiettal aachummey yn Choonseil Slattyssagh.
Ta olteynyn ennagh jeh’n Chiare as Feed smooinaghtyn dy lhisagh shirveishee çheet veih’n Chiare as Feed ny lomarcan, as dy lhisagh Tinvaal goll er reih ec y theay dy bollagh, syn ynnyd jeh shamyr heose ta goll er reih ec y Chiare as Feed.


PROFOUND CHANGES FOR SCHOOL STAFF THIS YEAR
Teachers as well as the Department of Education need to be prepared.

Goaill toshiaght ayns Mean Fouyir, bee caghlaaghyn mooarey syn aght ta’n skimmee goll er reaghey ayns scoillyn. Ta feme er ynseyderyn chammah as er y Rheynn Ynsee dy ve aarloo nyn gour, coardail rish John Dunford, y Scrudeyr Cadjin jeh Sheshaght Ard-Ynseyderyn ny Scoillyn Ard (Secondary Heads Association).
Bee doilleeidyn ayn kyndagh rish y pholasee t’ayn nish as cagliagh currit er yn earroo dy leih oddys obbraghey ayns rheynn-reiltys ennagh, ta John Dunford gra.
Va Mainshtyr Dunford ayns Mannin jea as eh resooney saaseyn dy leodaghey yn obbyr-phabyrey t’ec ynseyderyn ry hoi cur tooilley traa daue dy ve gynsaghey ayns brastyllyn. Ta ynseyderyn er ve prowal d’eaysley yn doilleeid jeh tooilley obbyr-phabyrey as currymyn-reirey rish paart dy vleeantyn. Sy Reeriaght Unnaneyssit, v’eh coardit dy beagh obbyr ennagh goit voish ynseyderyn as currit da skimmee-coonee (support staff).
Ta Mainshtyr Dunford gra nagh vod yn Ellan ‘fuirraghtyn as feddyn magh’ yn aght vees ny caghlaaghyn goll sy Reeriaght Unnaneyssit roish jannoo ny caghlaaghyn cheddin ayns shoh.


QUESTIONNAIRE ON COMMUTER TRAINS DISTRIBUTED
The study began last month and it’s hoped a report will be complete by June.

Y colught ta ronsaghey noddagh shirveish raad-yiarn cour troailtee-reiltagh (shen commateyryn) eddyr Doolish as jiass yn Ellan ve currit er bun, t’ad jerkal dy vow ad freggyrt mie rish feyshtane (questionnaire) t’ad cur magh. T’ad shirrey barelyn voish sleih mychione troailt gys y chied-valley (capital).
Ghow yn studeyrys toshiaght y vee shoh chaie, as t’ad jerkal dy bee imraa jeant roish Mean Souree. Philip Higgs, yn Ard-Choyrlagh jeh Boodeeys y Chiartey Çharmaanit (The Task Partnership Limited), t’eh ghra dy vel ad er chur magh meeilley feyshtane dy lieh (1,500).


PORT ST MARY CLERK OF COMMISSIONERS STEPS DOWN
Julius Popper leaves his post today after 13 years in the job.

Julius Popper, y Cleragh jeh Barrantee Phurt le Moirrey, t’eh girree ass oik y laa jiu, lurg tree bleeaney jeig sy chiartey. T’eh gra dy row yn aigney echey jeant seose lurg da fer veih’n theay caartrey eh lurg çhaglym.
Ga dy vel yn aigney echey jeant seose, t’eh gra dy bee eh doillee d’aagail y kiartey.


FRENCH CONSUL VISITS ISLAND
Monsieur Roche was here to establish links between France and the Isle of Man.

Consyl y Rank son Nalbin, Monsieur Roche, hug eh shilley er Mannin Jelune as Jemayrt. Ta’n eaghtyrys echey goaill stiagh Mannin chammah as Nalbin.
Haink Monsieur Roche dys shoh kianglaghyn y yannoo eddyr y Rank as Mannin.
Haink eh ny whail y Lhiass-Chiannoort, ard pholitickeyryn as Meoir Ghoolish.
Chammah as shen, haink eh ny whail sleih Frangagh ta cummal ayns Mannin.


CANCELLATION OF BOAT WEEKEND A BLOW TO PEEL
The Chairman of Peel Commissioners says he understands the cancellation.

Bert Quayle, Caairliagh Varrantee Phurt ny h-Inshey, t’eh gra dy vel y naight nagh bee Jerrey Shiaghtin ny Baatyn Tradishoonagh ayns Purt ny h-Inshey mleeaney, dy vel eh ny red olk da’n valley. Agh t’eh toiggal cre’n fa dy vel eh er ny scryssey.
Lurg çhaglym ny Barrantee fastyr mairagh, bee yn Lhiass-Chaairlagh, Pat Sweeney, ny Caairlagh jeh ny Barrantee.

Manx surnames: Cain, Caine

This is from Irish ‘Mac Catháin - ‘Son of the Warrior’ (‘battle’ in Irish and Manx is ‘cath’ / ‘cah’ and ‘cathán comes from this).
Gybbon and Patric Mac Kane were in the House of Keys in 1408. Before the 16th century, the ‘principal seat’ of the Cain(e) family was the treen of Ballacain in Ballaugh.


Naight Radio Vannin 7.5.03

MINISTER TO MAKE A STATEMENT ON OUT OF HOURS COVER
Leonard Singer, MLC, will initiate a full debate on the subject.

Y coarys (system) noa ry hoi shirveish fir-lhee cadjin (GP-yn) çheu-mooie jeh ooryn cadjin dy h-obbyr, yiow ad magh lurg paart dy hraa vel y coarys shen mie dy liooar, dooyrt David Anderson, oltey politickagh ayns Rheynn Slaynt as Shickyrys y Theay.
Lurg resoonaght ghow toshiaght reesht sy Chiare as Feed jea, nee’n Shirveishagh Slaynt, Clare y Christeen, fockley (statement) mychione y çhirveish lhiasit (revised) ayns Tinvaal y vee shoh. Ec y traa cheddin, ver Leonard Singer, oltey jeh’n Choonseil Slattyssagh, resoonaght ooilley-ghoaillagh fo raad mychione y chooish.
Sy chegeesh shoh çheet, ta Mainshtyr Anderson gra, nee yn rheynn echey freayll arrey er aggyrtyn (demands) y theay er yn çhirveish, as nee ad briwnys vel ee streeu rish (if it’s coping).


MHK CONTINUES TO DEMAND IMPROVED COVERAGE
David Cannan was behind the Keys motion which called on the minister to review the provision of out of hours primary health care.

She David Cannan, oltey jeh’n Chiare as Feed son Maayl, va’n fer hug treealtys speeideilagh da’n Chiare as Feed y shirveishagh dy aareayrtyssey yn aght ta’n theay geddyn chied chiarail slaynt (primary health care) çheu-mooie jeh ooryn cadjin dy h-obbyr.
Lhiasaghey veih Quintin Gill, oltey jeh’n Chiare as Feed son Rosien, ta cur er yn çhirveishagh slaynt dy chur fockley mychione y chooish da Tinvaal ayns Mee Boaldyn, va’n lhiasaghey shen er ny phohlldal feer niartal chammah as treealtys David Cannan.
Geiyrt er y resoonaght sy Chiare as Feed jea, ta Mainshtyr Cannan foast shirrey shirveish share son Mannin ooilliu veih fir-lhee çheu-mooie jeh ooryn cadjin dy h-obbyr.


REQUISITION MEETINGS
There will be by-elections for the House of Keys in Ramsey and in Rushen.

Ny tree yeearreyderyn sy fo-reihys ayns Rhumsaa, ghow ad ayrn ayns çhaglym sy valley riyr, raad va caa ec voteyryn feddyn magh barelyn ny yeearreyderyn. Dreggyr Anne Craine, Myles Hardman as Kevin Mayne feyshtyn mychione cooishyn eigsoylagh (various), paart jeu mychione Rhumsaa hene, as paart elley va smoo lhean. Ren ny cooishyn goaill stiagh lhiasaghey sy valley, Rhumsaa sy traa ry heet, earroo yn phobble ayns Mannin, yn chair dy chummal ayns Mannin, as lhiasaghey tarmaynagh. Ren y çhaglym tannaghtyn rish daa oor, as she John Kennaugh va ny chaairliagh.
Hed çhaglym fo-reihys elley er cummal ayns Rosien yn oie noght, ayns Halley Saasilee Phurt Çhiarn ayns Raad y Stashoon. Gowee yn çhaglym toshiaght ec lieh-oor lurg shiaght, as she Captan y Skeerey, John Clugaaish, vees ny chaairliagh. Ta kiare yeearreyderyn ayns fo-reihys Rosien: Phillip Crellin, Phil Gawne, Brian Goldie as Shirley Skears. Ny fo-reihyssyn ayns Rhumsaa as Rosien son y Chiare as Feed, hed ad er cummal Jerdein, y wheiggoo laa jeig jeh Mee Boaldyn.


CONTRACTS ARE NOT THE ONLY OBSTACLE TO DENTAL SERVICE PROBLEMS, ACCORDING TO THE HEALTH DEPARTMENT
The dentists say the main stumbling block is the Health Department’s insistence that they sign a contract obliging them to take a certain number of patients.

Coardail rish Geoff Newberry, y Reireyder Cadjin jeh Chied Chiarail Slaynt ayns Rheynn Slaynt as Shickyrys y Theay, cha nee conaantyn yn ynrican lhiettrimys ta cur sthap er feaysley yn argane eddyr y reiltys as sheshaght ny feeackleyryn.
Va shiartanse d’eyshtyn sy Chiare as Feed jea mychione yn çhirveish-feeackleyrys, mychione cooish ta sleih gra gear-ghaue (crisis) rish. Dooyrt Caairliagh Sheshaght Feeackleyryn Vannin dy nee yn lhiettrimys smoo va briwnys y Rheynn Slaynt geginagh feeackleyryn dy ghoaill rish conaant, veagh cur orroo goaill earroo soit dy hurransee.
Cha nel ny feeackleyryn coontey monney jeh shoh. Agh ta Geoff Newberry gra dy vel ny cooishyn bentyn rish listal (recruiting) feeackleyryn cramp. T’ad prowal skeymyn-listal eigsoylagh sy Reeriaght Unnaneyssit. Ta Mainshtyr Newberry jerkal dy chur treealtys noa da feeackleyryn yn Ellan - as da ny surransee neesht.

Manx surnames: Caley

In the Isle of Man, this is generally from Mac Caolaidhe - ‘Son of the Slender Man.’ In Manx, ‘keyl’ means ‘slender’ or ‘thin’. Maybe the original Caleys in the Isle of Man came from Tipperary. Later, one of the main branches of the Manx family was at Ballacaley, in Lezayre.
Arthur Caley (1809 - 61) was the Manx Giant. At age 22, he was 7ft 6in in height.
The name Caley (and similar spellings) can also be of English origin.


Naight Radio Vannin 14.5.03

PROPOSED NEW MOUNT MURRAY HOUSES ANGER MHK
Nine holes of the golf course would be lost if the scheme went ahead.

Y treealtys dy hroggal tree cheead thie noa ec Cronk Murray, she ‘sonnaase as daanys t’ayn yinnagh goaill yn ennal ayd ersooyl’, coardail rish Martyn Quayle, oltey jeh’n Chiare as Feed son Medall. Ta’n treealtys çheet veih’n reirey jeh Club-Çheerey as Thie-Oast Cronk Murray, as yinnagh eh goaill stiagh bunscoill noa, veagh currit myr gioot da’n Rheynn Ynsee. Veagh nuy tuill jeh’n choorse-golf er nyn goayl dy jinnagh y skeym goll er oi.
Veagh ny thieyn noa goll er troggal ayns rheynn-reihys Martyn Quayle. T’eshyn gra dy vel eh feer neu-chooie dy chur y treealtys shoh er e hoshiaght ec y traa t’ayn, tra ta’n Commishoon-Brialtys foast scrutaghey cooishyn Cronk Murray. Bee scruteyr neuchrogheydagh stiurey brialtys theayagh y vee shoh çheet mychione plan noa son Braddan. Ta Mainshtyr Quayle greinnaghey yn scruteyr plan noa Cronk Murray y cheau magh. As hannah, t’eh gra, ta’n theay soilshaghey dy vel ad slane noi’n phlan.


WALKING TWENTY-FOUR HILLS FOR CHARITY
Paul Rogers and Mark Kermode are undertaking a78 mile hike for cancer relief.

Ta daa ghooinney ynnydagh kiarail shooyl harrish ny kiare mulleeyn as feed syrjey ayns Mannin. Ta Pawl ap Rhosier as Markys y Kermod goll dy yannoo cosheeaght dy hree feed as hoght meeilley jeig dy chosney argid son Couyr Kahngyr Macmillan (Macmillan Cancer Relief) as Pohlldal Kahngyr (Cancer Backup).
T’ad kiarail jannoo yn chosheeaght çheu-sthie jeh tree laa, veagh cur orroo shooyl daa veeilley yeig gagh laa. Ta’n jees oc shickyr dy vod ad roshtyn y dean shoh.
As bee ad taggloo Gaelg car y traa.


DEFEAT FOR REVISED AMENDMENT BILL
The House of Keys rejected the bill by eleven votes to ten.

Va’n Reiltys currit fo haart sy Chiare as Feed bentyn rish y Villey Lhiasaghyn, v’er ngoll er caghlaa. Yioold y Chiare as Feed y billey ec y nah lhaih, liorish un vote jeig noi jeih.
Yn Ard-Shirveishagh Richard Corkill, ren tayrn sheear lhieggan sleaie (earlier version) jeh’n villey yn vee shoh chaie, ren eshyn failleil dy yannoo olteynyn booiagh dy jinnagh y caghlaa sy villey leodaghey yn gaue dy derragh slattys veih’n villey tooilley smaght da’n Reeriaght Unnaneyssit er Mannin.
Hoilshee Mainshtyr Corkill dy nee billey neuchramp v’ayn. Cha jinnagh eh lhiggey agh kuse dy lhiasaghyn dy ve jeant liorish oardaghyn veih Coonseil ny Shirveishee. Begin da Tinvaal coardail rish lheid ny h-oardaghyn, as cha jinnagh ad tayrn stiagh agh yn enney jeh lughtyn-reill aa-enmyssit sy Reeriaght Unnaneyssit (the recognition of re-designated UK authorities) as quaiyllyn jeeveanit (devolved assemblies), goll rish Ard-Whaiyl Nalbin.


BILL TO IMPROVE ELECTION TURNOUT
David Cretney MHK is suggesting a number of measures .

Oltey jeh’n Chiare as Feed son Doolish Yiass, David Cretney, t’eh cur roish billey oltey preevaadjagh dy phrowal dy ghreinnaghey tooilley sleih dy votal ayns reihyssyn. T’eh gra dy vel kiangley eddyr neuyeeanid ny voteyryn as ny ta sleih coontey jeh politickeyryn. As t’eh credjal dy vel eiyrtys veih naightyn veih’n Reeriaght Unnaneyssit mychione politickeyryn, dy vel shen ny lhie er sleih ayns Mannin.
Ta pohlldal coaignagh y Chiare as Feed ec David Cretney yn billey shoh y chur er e hoshiaght. Mastey ny faaueyn t’eh cur, ta cummal reihyssyn ayns Mean Fouyir, mooadaghey yn traa ta ny h-ynnydyn-votal foshlit, as cur kied da sleih ta shey bleeaney jeig dy eash dy votal.


PUBLIC MEETING OVER BIRCH HILL HOUSING SCHEME
There is a plan to build 135 houses on land adjoining the Birch Hill estate in Onchan.

Hed çhaglym theayagh er cummal noght dy resooney yn treealtys dy hroggal shey feed as queig thieyn jeig er thalloo lhiattaghey steat-thieyn Cronk Beih ayns Kione Droghad. Va cummaltee ayns shen shirrey yn çhaglym, as ad cur nyn enmyn er aghin shirrey yn caa dy resooney ny boiraghyn oc.
Ny h-olteynyn ynnydagh jeh’n Chiare as Feed, Barrantee Kione Droghad, as çhaghteryn veih Thieyn Eiraght (Heritage Homes), t’ad ooilley er ngeddyn cuirraghyn dy ve ayn.
Y çhaglym, vees goaill toshiaght ec lieh-oor lurg shiaght, hed eh er cummal ayns Halley Killagh Noo Peddyr ayns Astyl Reeoil. She Harvey Briggs, Captan y Skeerey, vees ny chaairliagh.


Manx surnames: Callin / Callan

This name comes from the Gaelic Mac Aileáin or Mac Ailín - ‘Son of the Noble One’. The main seat of the family in the Isle of Man was Ballacallin in Kirk Patrick, with a smaller branch at Ballacallin in Marown.
A branch of the family from Patrick altered the spelling to Callan in the 1880’s.


Naight Radio Vannin 21.5.03

HEALTH MINISTER RESTATES POSITION ABOUT HEALTH CARE IN THE ISLAND
Clare Christian has restated the reasons for the removal of twenty-four hour GP cover at Ramsey Cottage Hospital.

Ta’n Shirveishagh Slaynt, Clare y Christeen, er nockley reesht ny h-oyryn nagh vel fir-lhee cadjin ayn kiare oor as feed sy laa ec Thie-Lheihys Cott Rhumsaa.
Dinsh Clare y Christeen da Tinvaal jea dy jinnagh y rheynn eck foast ronsaghey ny reddyn oddys ve jeant. Agh dooyrt ee myrgeddin dy nee ny fir-lhee hene ayns Mannin yinnagh reaghey ny veagh taghyrt.


CALL FOR REVIEW OF TAX RELIEF SYSTEM
A Ramsey Commissioner suggests money from the system could help first-time buyers of houses.

Ta Barrantagh ayns Rhumsaa, Richard y Radlagh, shirrey aa-reayrtys jeh coarys-coonee keeshyn (tax relief system) yn Ellan ec çhaglym noght. T’eh cur faaue dy noddagh argid veih’n choarys cooney lhieusyn ta kionnaghey thie son y chied cheayrt.
Ta Mainshtyr y Radlagh credjal dy vod y coarys-coonee keeshyn t’ayn nish jannoo foays dauesyn as kuse dy hieyn oc. By vie leshyn argid veih’n choarys dy ve currit raad ta feme er. T’eh smooinaghtyn dy vel shoh ny aght noa argid y ghiennaghtyn son lughtyn-reill ynnydagh yn Ellan.
Ta Mainshtyr y Radlagh er chur roish ‘raaue jeh treealtys’ (‘notice of motion’). My vees niart currit rish shen, foddee yn faaue goll er scrutaghey rish mee, roish goll gys ny Barrantee son ronsaghey ec y nah haglym.


IRISH PRESS REPORTS ABOUT ISLE OF MAN ‘INACCURATE’
The Chief Financial Officer is responding to articles in the Irish press.

Coardail rish yn Ard Fer-Oik Argidoil, Mark Shimmin, bentyn rish skeealyn ayns Pobblaght Nerin, cha nel ny skeealyn shen kiart mychione Mannin, e reillaghyn argidoil as e kianglaghyn lesh ny lughtyn-reill Yernagh.
Ta Mark Shimmin freggyrt strane dy h-artyn ayns ny pabyryn-naight Yernagh er y gherrid mychione cooishyn-leigh as binshyn (tribunals) ayns y Phobblaght. T’ad shoh er ngoaill stiagh anreiltyssyn-keesh bentyn rish Yernee berçhagh, kuse jeu lesh argid tashtit ayns Mannin. Va un chooish mychione peiagh ta cummal ayns Mannin nish.
Ta ny lughtyn-reill Yernagh er ve jannoo nyn gooid share dy hickyraghey dy vel Yernee geeck ny keeshyn oc. Agh ta art ny ghaa ayns ny pabyryn-naight Yernagh er chur faaue dy vel Mannin ny fastee dauesyn ta foast jerkal shaghney eeck nyn geeshyn, red ta Mainshtyr Shimmin gobbal.


RELUCTANCE SHOWN TO SHELTERED ACCOMMODATION
The Local Government Minister was a guest at the opening of the new Heywood Court complex.

Ta Shirveishagh Reiltys Ynnydagh, Pam Crowe, er loayrt mychione y neuarryltys jeh sleih ayns Mannin d’aagail ny thieyn oc as goll dy chummal ayns thieyn coadit.
Va Pam Crowe nane jeh ny goaldee tra hie ard-hroggalys noa Cooyrt Heywood er fosley ayns Kione Droghad ny sleaie sy çhiaghtin. T’ee moylley dy mooar ‘lhiasaghey yindyssagh’, myr t’ee gra rish. Agh t’ee gra nagh vel eh kinjagh aashagh d’eddyn tannyssyn son thieyn coadit.


‘SAFE IN THE SUN’ CAMPAIGN
Manx people are at risk from skin cancer.

Ta Manninee currit ayns gaue liorish kahngyr-crackan, coardail rish Rheynn Slaynt as Shickyrys y Theay. Ta’n Rheynn er lunney faghtys (campaign) ny ghaa fo’n chullee ‘Sauçhey fo’n Ghrian 2003’. T’ad cruinnaghey stiagh er y chooish jeh kahngyr-crackan y çhiaghtin shoh.
T’ad gymmydey posteyryn as duillagyn dy chur er e hoshiaght y foays jeh coadey-greiney son babbanyn, paitçhyn as sleih aasit, goaill stiagh adsyn ta gobbraghey çheu-mooie dy reiltagh. Çheet dy ve losht un cheayrt ec y ghrian, ta shen mooadaghey yn gaue jeh’n ghorley.
Y Stiureyder jeh Sharaghey Slaynt (Health Promotion), Lez Dorward, t’eh gra dy vel eh doillee cur er sleih dy hoiggal y chooish gyn y ve troiddey.

Manx surnames: Callister, Collister

This name is from Mac Alastair, or Son of Alexander. Alexander is a Greek name, meaning ‘Helper of Men’ or ‘Defender of Men’. The ‘a’ in ‘Callister’ is always pronounced like the ‘a’ in English ‘what’ in the Isle of Man.
The main seat of this family was Ballacollister in the parish of Lonan.


Naight Radio Vannin 28.5.03

FEARS FOR STEAM PACKET’S FUTURE
Leonard Singer MLC has asked for assurances over jobs and pensions.

Ta oltey jeh’n Choonseil Slattyssagh, Leonard Singer, er screeu gys yn Ard-Shirveishagh dy hirrey shickyrys dy bee kiartaghyn as penshynyn ec y Phaggad Bree sauçhey. Ta’n colught er ve ry chreck neayr’s Mee Vayrnt, tra ren e phaarant, Cummeydaneyn Marrey (Sea Containers), çhebbal eh dy gheddyn rey rish keead millioon punt d’eeaghyn.
T’ad jerkal rish fockley (announcement) mychione y chooish ny s’anmagh sy çhiaghtin shoh, as faaue ec paart dy leih dy vel y colught kionnit ec banc. Ta shoh er ny obbal, as Cummeydaneyn Marrey gra dy vel barganey foast goll er.
Ta screeuyn Vainshtyr Singer shirrey ‘shickyrys veih ny shellooderyn noa’ nagh bee sleih currit ass obbyr as dy jean y skeym-penshyn tannaghtyn ayns bree.


MHK’S WARNING OVER PROPOSED EU CONSTITUTION
It is the intention of the Isle of Man Government to preserve the Island’s present constitutional position.

Ta’n Ard-Shirveishagh er ghra dy baghtal dy vel Reiltys Vannin kiarail cummal seose staydys Vannin myr Crogheen-Crooin (Crown Dependency) chammah as mooinjerys Vannin lesh yn Unnaneys Oarpagh. Va shoh jeant baghtal ayns freggyrt rish feysht screeut sy Chiare as Feed veih’n oltey son Maayl, David Cannan. V’eh briaght cre harragh er Mannin kyndagh rish aght-reill noa yn Unnaneys Oarpagh.
Dinsh Mainshtyr Corkill da’n oltey son Maayl dy bee eh traa foddey roish my jed y teks jerrinagh jeh’n chonaant er coardail liorish ooilley ny steatyn ta nyn olteynyn jeh’n Unnaneys. Agh ta Mainshtyr Cannan shirrey er y Reiltys ad dy yannoo reddyn nish.


SAME DAY LOCAL ELECTIONS PROGRESS
A bill to have all local elections on the same day has gone through the Keys.

Billey ry hoi reaghey ooilley ny reihyssyn ynnydagh er y laa cheddin, t’eh er ngoll trooid y Chiare as Feed. T’ad kiarail caghlaa reddyn elley ayns reiltys ynnydagh lesh y villey shoh myrgeddin, as ny mast’oc, mooadaghey yn traa vees olteynyn ayns oik veih tree gys kiare bleeaney.
She oltey jeh’n Chiare as Feed son Kione Droghad, Adrian Earnshaw, ta stiurey yn billey shoh. T’eh gra dy vel barelyn eigsoylagh ec sleih mychione ny caghlaaghyn treealit. T’ad er nyannoo nyn gooid share dy yannoo booiagh whilleen sleih as oddys ad. She oltey elley son Kione Droghad, Peddyr Karran, ren goll noi’n villey son y chooid smoo. Agh ta Mainshtyr Earnshaw credjal dy vel eh pohlldal caghlaa jarrooagh.
Oltey yn Chiare as Feed son Malew as Stondane, y Captan Andrew Douglas, phrow eshyn dy neuspeeideilagh y billey y chur ry lhiattee ec keim ny h-oltyn (the clauses stage). Smooinee y Captan Douglas dy lhisagh ad er chur caa da ny lughtyn-reill ynnydagh eieyn Vainshtyr Karran y resooney.


NEW TT BOOK BY LOCAL AUTHOR
David Wright’s book traces the TT from its beginnings in 1907.

Ta lioar elley mychione y TT er ny chur magh ayns traa son feailley TT mleeaney.
Ta’n lioar liorish ughtar ynnydagh, David Wright, as t’eh mychione y TT neayr’s y traa ren eh goaill toshiaght, sy vlein nuy cheead jeig as shiaght. T’eh goaill stiagh yn aggle ayns ny bleeantyn tree feed as jeih dy beagh yn eailley marrooit tra va sthap currit da ratçhal-feniaghtys syn Ellan.
Agh t’eh scrutaghey yn aght ta’n eailley er ngoll er dy chummal seose e h-ynnyd myr nane jeh ny taghyrtyn smoo sy teihll son ratçhyn roaryn-bree.


MANXWOMAN COULD BE BRITAIN’S ‘FRIEND IN A MILLION’
Linda Meecham was nominated by Lynne Cain for the way she helped her.

Oddagh ben voish Mannin ve ‘Carrey mastey Millioon’ y Vretyn Vooar. Va Linda Meecham er ny h-enmys liorish Lynne Cain tra hooar Lynne magh dy row kahngyr-keeagh jannoo urree. Scryss Linda laghyn seyrey dy phohlldal e carrey tra v’ee geddyn lheihys kemmigagh (chemotherapy). Chammah as cur shilley er Lynne sy thie-lheihys gagh laa, hrog Linda ny smoo na kiare cheead punt cour kiarail kahngyr-keeagh.
Ta Lynne gra dy nee traa doillee ass towse v’ayn. Cha noddagh ee beaghey trooid y lheihys mannagh row Linda cooney lhee cho niartal.
Ta Linda nane jeh queig jerrinee jeig sy cho-hirrey. Bee fys eck lurg kegeesh vees ee goll er crooinaghey myr ‘Carrey mastey Millioon’ ny dyn.
Yn ard-aundyr, shen jerrey shiaghtin soaillagh son daa pheiagh. Yinnagh Linda cur Lynne lhee myr sheshey troailt.


Manx surnames: Callow and Cowley.

It looks as though both of these names came from a Gaelic - Norse combination ‘Mac Olaf’ - ‘Son of Olaf’. ‘Olaf’ means ‘Ancestor’ or Peaceful Reminder’.
‘Mac Olaf’ developed into ‘Mac Allow’ and then ‘Callow’ - a name that use to be found mainly in the west of the Island.
‘Mac Olaf’ was also made more Gaelic as ‘Mac Amhlaoibh’, giving ‘Cowley’ (correctly pronounced ‘Cowla’) in the Isle of Man and ‘Mac Auliffe’, etc., off the Island.


Naight Radio Vannin 4.6.03

JUNIOR RACE DAY
The Junior and the second of the sidecar races are scheduled for today.

Va ratçhal dy ghoaill toshiaght ec kerroo gys nane-jeig moghrey jiu, lesh TT Soshar 600 y Phaggad Bree. Reesht, veagh Adrian Archibald, cosneyder Formley Nane Jesarn, ratçhal noi fir goll rish John McGuinness as Ian Lougher.
Lurg y Ratçh Soshar, v’ad kiarail cummal y nah ratçh çheu-charr, er ny chur er e hoshiaght liorish Thie-Oast as Cronghyr y Hilton. Ta Dave Molyneux jeean dy ghoaill cooilleeney er Ian Bell as Neil Carpenter, hooar y varriaght Jesarn. Begin da Molyneux cur seose, kyndagh rish doilleeidyn çhagnyssagh ec stashoon-barroose Rhumsaa er y chied gharrey. Hoilshee eh ny haghyr er Radio TT.
V’ad kiarail dooney ny raaidyn ec jeih er y chlag moghrey jiu as fosley ad ec queig er y chlag, my va gagh red goll dy mie.


IMF REVIEW LOOKS POSITIVE
The Financial Supervision Commission has released its annual report.

Ta Barrantee Oaseirys Argidoil (Financial Supervision Commission) er chur magh nyn imraa bleinoil. T’ad gra dy vel feme foast er reilley trome as plannyn ry hoi lhiasaghey slattyssyn vees aashagh dy hoiggal as dy ymmydey.
Kyndagh rish shen, ta feme er aareayrtys dowin jeh leigh yn Ellan bentyn rish colughtyn, neuhooghid as argidys. Oddagh shoh leeideil gys cur er bun yn oik jeh Resowir Oikoil.
As y scrutaght jeant liorish y Tashtey Argidoil Eddyrashoonagh, t’eh jeeaghyn dy bee shen foaysagh da Mannin.


NEW MANAGER FOR NOBLE’S HOSPITAL
Paul Shields was born and educated in Liverpool and has worked for the National Health Service for twenty years.

Ta reireyder noa Thie-Lheihys Noa Noble er ny phoinsheil. Nee Paul Shields goaill yn obbyr ayns laue roish foddey, as bee eh gobbraghey marish y reireyder t’ayn nish, Frank Inman, derrey hig eshyn dy ve ny haaue ny s’anmagh sy vlein shoh.
Va Mainshtyr Shields ruggit ayns Lerpoyll as hie eh er ynsaghey ayns shen. T’eh er nobbraghey son Shirveish-Slaynt y Theay rish feed blein. Ec y traa t’ayn, she reireyder cadjin eh ayns Oxford ec thie-lheihys treisht ayns Shirveish-Slaynt y Theay.
Y Shirveishagh-Slaynt, Clare y Christeen, t’ee gra dy vel oayllys dowin ec Mainshtyr Shields er y cherroo-slaynt. Lhisagh shen cur yn ablid da dy chooilleeney yn currym noa echey.


AUSSIE LOOKING FOR ISLAND POEMS
The poems must have ‘an islanded consciousness’.

Ta scoillar Austrailagh, Peter Hay, shirrey draneyn screeut ec sleih ta cummal ayns ellanyn. Ta Mainshtyr Hay ny leaghteyr jeh studeyrys-çhymmyltaght as lettyraght sy Tasmaan. T’eh femblal lioar dy ghraneyn ellanagh.
T’eh gra nagh nhegin da ny draneyn ve mychione cummal ayns ellan. Agh, myr t’eh gra, shegin ‘bree ellanagh’ ve oc. By vraew leshyn geddyn draneyn cho leah as oddys eh.
Ta’n enmys post-L echey ry gheddyn er ynnyd-eggey Radio Vannin:
prhay@postoffice.utas.edu.au


MORE VISITORS TO HERITAGE SITES
More than 400,000 people visited Manx National Heritage sites in 2002.

Yn earroo dy leih hug shilley er ynnydyn Eiraght Ashoonagh Vannin, hie eh seose liorish daa-yeig sy cheead. Hug ny smoo na kiare cheead meeilley dy leih shilley er ny h-ynnydyn sy vlein daa veeilley as jees. Ta Eiraght Ashoonagh Vannin er voylley yn pohlldal t’ee er ngeddyn harrish y vlein shoh chaie.
Ta shiaght persoonyn ass keead jeh cummaltee Vannin nyn olteynyn jeh Caarjyn Eiraght Ashoonagh Vannin. Shoh nane jeh ny h-olteynyssyn-pohlldal smoo t’ec reagheydys thie-lheihys erbee ayns ny h-ellanyn shoh.
Y Stiureyder, Stephen Harrison, t’eh gra dy vel ny toyrtyssyn veih ny Caarjyn as yn obbyr ry hoi troggal argid ta jeant oc er ve feer foaysagh as Eiraght Ashoonagh Vannin cummal seose ynnydyn shendeeagh yn Ellan.


Manx surnames: Craine, Carine, Caren, Carran and Karran

These all come from same root - Gaelic Mac Ciaráin (Son of Kieron) or Mac Giolla Ciaráin (Son of the Servant of Kieron). Two sixth century Irish saints were called Ciarán. The name means ‘dark’, from Gaelic ‘ciar’ / ‘keeir’. This was a widely scattered family in the Isle of Man - maybe the different English spellings of the name reflects this.


Naight Radio Vannin Jemayrt, 10.6.03

ARCHALLAGAN SITE COULD BE UNIQUE
A consultant said he had no experience of a site set within a plantation on a hillside.

Ynnyd lhieeney-thalloo Archallagan, my vees ee coardit, oddagh ee ve gyn cosoylaght ayns ny h-ellanyn shoh, coardail rish Neil Pendell, fer-coyrlee er lheh ta gobbraghey ass lieh Rheynn Reiltys Ynnydagh as y Çhymmyltaght.
Dinsh Mainshtyr Pendell da’n vrialtys-plannal ec Thie-Oast Cronk Murray dy vel eh cliaghtey gobbraghey er jeih ny queig-jeig dy haleeyn lhieeney-thalloo ec yn un cheayrt. Agh cha ren yn obbyr echey rieau goaill stiagh ynnyd ayns keyll v’er lhargagh. Ny yei shen, v’eh er nakin ynnydyn smessey.


ARCHALLAGAN SITE QUESTIONS
Government claims that it would plant the site with trees are being questioned.

Caairliagh Varrantee Pherick, Joe O Hanlon, ta noi’n treealtys dy lhieeney thalloo lesh orçh ec Archallagan, t’eh ouryssagh mychione aggyrtyn veih’n Reiltys dy jinnagh ad soie biljyn ayns shen tra veagh yn ynnyd lhieent.
Ta Mainshtyr O Hanlon gra dy vel yn eie sheeaney ro ghoillee as dy beagh cochassaghyn (complications) ayn. Hroggagh y lhieeney-thalloo y leval-thallooin liorish queig-jeig ny feed dy veadaryn. Dooyrt Mainshtyr O Hanlon dy jinnagh shen croo doilleeidyn tra veagh ad cur baare er yn ynnyd as ad prowal biljyn as rassanyn y hoie stiagh ayn.


DECISION ON EUROPEAN UNION TAX REFORM PACKAGE
It’s widely believed the Island will choose ‘withholding tax’ rather than ‘disclosure of information’.

Freggyrt Vannin rish aachummaghyn-keesh yn Unnaneys Oarpagh, ta shen çheet magh y laa jiu. Ga nagh vel faaue erbee er jeet magh mychione y reih jerrinagh, shimmey peiagh ta credjal dy jean yn Ellan reih ‘cummal keesh’ as cha nee ‘soilshaghey fysseree’.
S’cosoylagh dy jig fockley Vannin magh ec y traa cheddin as focklaghyn elley goll rish shen veih Jersey as Guernsey.
Raink shirveishee argidoil yn Unnaneys Oarpagh coardailys mychione mynjeig aachummey-keesh (tax reform package) lurg resooney dowin as cumrail ennagh.


MENTAL HEALTH CONFERENCE
The centre-piece of the conference was a play called ‘Reading the Signs’.

Va co-whaiyl ayns Doolish jea mychione slaynt inçhynagh. Kuse dy leih ren goaill ayrn ayn, t’ad moylley yn irrinaght jeh cloie va ny ard-veer jeh’n cho-whaiyl.
She ‘Lhaih ny Cowraghyn’ (‘Reading the Signs’) ennym y chloie, as t’eh mychione yn aght ta çhingys inçhynagh çheet er dooinney aeg, as y doilleeid ta’n voir echey feddyn as ish prowal dy gheddyn lheihys cooie da.
Ta Christine Brown as Joyce Healey gra dy row yn cloie myr bea firrinagh. Hoilshee eh paart jeh ny doilleeidyn haink orroosyn hene as ad geddyn cooney son ny mec oc.


MALE IGNORANCE OF PROSTATE RISKS
The aim is to raise awareness about cancers affecting men.

Ta deiney foast saastagh (complacent) mychione y gaue jeh kahngyr prostaitagh, coardail rish Rheynn Slaynt as Shickyrys y Theay. Shoh Shiaghtin Ashoonagh Slaynt Deiney sy Reeriaght Unnaneyssit as ta’n Rheynn kiarail cur er deiney dy chur tooilley twoaie da kahngyryn oddagh jannoo orroo.
Ta’n Rheynn greinnaghey deiney dy ve twoaieagh mychione caghlaaghyn ta çheet er ny kirp oc, erskyn ooilley tooilley neuaash, ny jannoo moon ny s’menkey.
Don Murray, fer as kahngyr prostaitagh jannoo er, t’eh gra dy vel eh scanshoil dy ve jarrooagh eer my ta’n çhingys shen jannoo ort.


Manx surnames: Comish, Camaish, Comaish

All these come from Gaelic Mac Thomais or Mac Thomáis, ‘Son of Thomas’ - equivalent to English ‘Thom(p)son’. The surname Comish was associated with the south of the Isle of Man and Camaish with the north. The principal seat of the Comish family was Ballacomish in Kirk Arbory, while the main seat of the Camaish faimily was Ballacamaish in Kirk Andreas.
There are no Camaish’s at all in the present Isle of Man phonebook, and of the eleven entries for Comish only three are in the south!


Naight Radio Vannin 18.6.03

DOMESTIC WASTE CHARGES MAY BE DROPPED
The Speaker of the House of Keys will ask Tynwald to drop the proposal to charge private householders for the disposal of domestic waste.

Nee Tony Brown, Loayreyder y Chiare as Feed, shirrey er Tinvaal y laa jiu dyn dy chur er e hoshiaght y treealtys dy chur er y theay dy eeck son geddyn rey rish orçh veih thieyn preevaadjagh.
Ayns lhiasaghey lesh shey ayrnyn as tree cheead fockle, nee eh gra nagh lhisagh y Reiltys, ny Rheynn Reiltys Ynnydagh as y Çhymmyltaght, ny yn Boayrd Reirey Orçh, cur er sleih ayns thieyn preevaadjagh dy eeck son geddyn rey rish orçh.
Nee eh gra dy lhisagh sleih eeck son geddyn rey rish orçh jeadyssagh (industrial) as rish orçh traghtee, agh cha lhisagh y theay ve eginit dy eeck son cur orçh ayns ynnydyn-orçh theayagh.
Nee Mainshtyr Brown cur roish ny treealtyssyn shoh ayns resoonaght mychione taillaghyn-orçh, vees currit fo raad ec y Çhirveishagh-Çhymmyltaght, Pam Crowe.


MOVE TO CENSURE DHSS FAILS IN TYNWALD
Despite pressure for a re-think on out of hours medical care, most members of Tynwald were not prepared to censure the DHSS.

Ga dy daink traastey veih Rhumsaa dy smooinaghtyn reesht mychione freayll kiarail-lheihys çheu-mooie jeh ooryn-obbyr cliaghtagh, cha row yn chooid smoo jeh olteynyn Tinvaal arryltagh dy chur oghsan da Rheynn Slaynt as Shickyrys y Theay bentyn rish y chooish.
Va Leonard Singer, oltey jeh’n Choonseil Slattyssagh, er chur roish treealtys va shirrey er Tinvaal ad dy ghoaill arrys dy ren y Rheynn failleil dy yannoo red erbee mychione boiraghyn y theay bentyn rish y chooish feiy’n Ellan.


FRENCH POLICE REOPEN MUR
DER INVESTIGATION WITH ISLE OF MAN LINK.
The skull of a child has been discovered in northern France.

Ta meoiryn-shee Frangagh ronsaghey cooish-dunverys reesht. Hug y chooish shoh er meoiryn-shee Frangagh dy chur shilley er Mannin kiare bleeaney er dy henney. Haink ad dys yn Ellan as ad shirrey yn Fer-Lhee Yves Godard, va fo ourys dy varr eh yn ven echey sy thie oc ayns Normandie ayns Jerrey Fouyir, nuy cheead jeig, kiare feed as nuy-jeig.
Cha dooar ad y fer fo ourys ayns shoh, as ren ad troailt my hwoaie dys yn Ellan Lioas, raad va skeeal neuhickyrit dy vaik peiagh ennagh y fer-lhee as y daa phaitçhey aeg echey.
Nish t’ad er ngeddyn y vollag jeh nane jeh ny paitçhyn sy twoaie jeh’n Rank, as ta ny meoiryn-shee er ngoll erash dys Steornavaie dy hirrey tooilley leeidyn.


POST OFFICE CHIEF SUMMONED TO TYNWALD
Concerns have been raised in Tynwald over the sub-post office at Ballasalla.

Hig Ard-Sheckteragh Phost Ellan Vannin dys Barr Tinvaal moghrey jiu kyndagh rish boiraghyn hie er troggal syn ard-whaiyl mychione fo-offish phostagh Valley Sallagh.
Treealtys, va currit roish ec John Houghton, oltey jeh’n Chiare as Feed son Doolish Twoaie, myr cooish jeh scansh theayagh, ren eh jeeraghey er daa red.
V’ad shoh y fondid jeh conaant y fo-vainshtyr postagh enmyssit (designate), as y briwnys d’arraghey yn offish phostagh veih’n voayl t’ee er ve ayn rish foddey, faggys da’n çhymmyltane (roundabout) as beeal rish y thie-lhionney, y Chlagh Vane, dys Y Çhenn Shapp-Fuinnee (Ye Olde Bakery Store).
Y laa jea, Eaghtyrane Tinvaal, Noel Cringle, hug eh sheear y resoonaght mychione cre hig er offish phostagh Valley Sallagh, derrey oddys ad feddyn magh vel conaant fondagh ec y fo-vainshtyr postagh enmyssit ny dyn.


LORD FILKIN COULD BE NEW MINISTER FOR CROWN DEPENDENCIES
This follows the changes in the United Kingdom’s ministerial and legal systems.

Ayns y Reeriaght Unnaneyssit, s’cosoylagh dy bee yn Çhiarn Geoff Filkin y shirveishagh ayns Rheynn Cooishyn Bunraghtoil (Department of Constitutional Affairs) vees freggyrtagh son Mannin.
Hie Rheynn Cooishyn Bunraghtoil er croo myr nane jeh ny caghlaaghyn ayns shirveishee as coarys leighoil y Reeriaght Unnaneyssit v’er nyn vockley liorish Tony Blair y çhiaghtin shoh chaie. Va rheynn y Çhiarn-Shansyleyr (Lord Chancellor) er ny h-astyral.


Manx surnames: Cannan, Cannon

This is from the Gaelic Mac Canann - Son of Cana, or Son of the Wolf.
George Quayle Cannon (1827 - 1901) was president of the Mormons and represented them in the American Congress. Incidentally, his name shows the Manx custom of using a surname (often of the mother) as a first name.


Naight Radio Vannin 25.6.03

BOUNDARIES BILL MOVES FORWARD
Middle MHK Martin Quayle will bring forward a private member’s bill to redefine constituency boundaries.

Ta Martin Quayle, yn oltey jeh’n Chiare as Feed son Medall, er ngeddyn kied dy chur roish billey oltey preevaadjagh dy chaghlaa ny cagleeyn jeh rheynnyn-reihys son ard-reihyssyn y Chiare as Feed.
She yn dean, kiartaghey meechorrymid t’er jeet rish syn earroo dy voteyryn son gagh soiag sy Chiare as Feed. Ta mysh kiare-jeig as daeed meeilley as queig cheead (57,500) voteyr syn Ellan, veagh cur er yn earroo slanjeant dy ve daa veeilley dy lieh (2,500) son gagh soiag.
Agh nish ta nane as daeed sy cheead (41%) dy voteyryn ny smoo na’n earroo meanagh shen ayns Medall, as tree-jeig as feed sy cheead (33%) ny smoo ayns Garff. Ta Mainshtyr Quayle gra dy vow eh coyrle veih olteynyn jeh’n Chiare as Feed sy tourey d’eddyn magh ny t’ad coontey jeh’n chooish.
Ta Mainshtyr Quayle currit da çhaghterys smoo cairagh, myr t’eh gra rish, son sleih Vedall. Agh t’eh gra dy nee doilleeid feiy’n Ellan t’ayn.


SMACKING CHILDREN - REACTION IN THE ISLAND
People questioned by Manx Radio on the subject were generally in favour of the practice, provided it was as a last resort.

Vrie dooinney voish Radio Vannin jeh sleih cadjin c’red v’ad coontey jeh cur bassag da paitçhyn. Son y chooid smoo, va’n sleih shen ayns foayr jeh, choud’s nagh row couyr erbee elley ayn, as choud’s nagh row ny paitçhyn bwoaillt ro chreoi.
Va barelyn y sleih er nyn shirrey erreish da bing ardwhaiyllagh sy Reeriaght Unnaneyssit v’er resooney dy row yn fendeilys leighagh jeh ‘smaghtagh resoonagh’ ayns meechoardailys rish Conaant ny h-Ashoonyn Unnaneyssit cour Cairyn ny Paitçhyn.


LITTER DANGER TO PETS
A vet is warning of the danger from carelessly discarded litter.

Ta lhee-baagh ayns Mannin, Ray Cox, cur raaue mychione yn assee oddagh orçh ta ceaut ersooyl dy meereggyragh jannoo da bigginyn as beiyn-gowaltys.
Bee va ceaut ersooyl as er loaughey, ta Ray Cox gra, t’eh jannoo skielley da gaillaghyn. As beiyn ta sluggey orçh, shen boirey elley. Trass ghaue, shen gless va ceaut ersooyl.
Myr freggyrt rish faghtys (campaign) y reiltys ‘Glen Mannin’, ta Mainshtyr Cox greinnaghey dy chooilley pheiagh dy smooinaghtyn er beiyn as goaill kiarail smoo tra t’ad geddyn rey rish orçh.


BAN ON SELLAFIELD EFFLUENT
A survey commissioned by Greenpeace has revealed radioactivity in salmon on sale in major UK supermarkets.

Towshan v’er ny oardaghey ec Greenpeace, t’eh er hoilshaghey dy vel goul-roorid ayns braddanyn ta goll er creck ayns ard-vargaghyn mooarey sy Reeriaght Unnaneyssit. Ta shoh er chur er Reiltys y Reeriaght Unnaneyssit sthap shallidagh y chur er ceau tooilley orçh goul-rooragh ayns Mooir Vannin veih Sellafield.
Ny levallyn dy heghnaiçhum kiare feed as nuy-jeig (99) va feddynit ayns ny eeastyn, ta Greenpeace goaill rish nagh vel ad feer ghaueagh. Ny yei shen, hirr Reiltys y Reeriaght Unnaneyssit er Connaghyn Çheshveanagh Goaldagh (British Nuclear Fuels) dyn y cheau tooilley stoo stiagh sy cheayn son nuy mee, derrey vees aght elley oc dy gheddyn rey rish y stoo.
Sheanseyr Shinsharagh (Senior Scientist) ec Seyrlannyn Reiltys Vannin, y Dr Paul McKenna, t’eh gra nagh vel towshan Greenpeace er anchoodaghey fysseree noa, ny fysseree vees cur yindys er sleih. Agh ta’n towshan er hoilshaghey sollaghey çheshveanagh ec traa scanshoil.


RAMSEY IN BLOOM
There are six days left to enter this year’s Ramsey in Bloom competition.

Ta shey laa faagit dy ghoaill ayrn sy cho-hirrey Rhumsaa my Vlaa mleeaney.
Y laa s’jerree son entreilys, shen Jelune, y jeihoo laa as feed jeh Mean Souree.
Ta fermyn-entreilys ry gheddyn ec y halley-balley.
Hed briwnys er cummal sy vean jeh Jerrey Souree.


Manx surnames: Carroon, Corooin

There are twelve entries under ‘Carroon’ in the present Isle of Man phonebook, but none under ‘Corooin’.
The origin of the name isn’t clear. It might have come from an old Irish name,
Mac Eireamóin, Son of Eireamóin.
Or it might have come from Ó Ciardhubháin - Descendant of the Dark-haired One.
Finally, the Manx scholar J J Kneen suggested the name might have come from the Gaelic-Norse name Mac Thorfin - take your pick!


Naight Radio Vannin 2.7.03

DRAMA AT ISLAND GAMES
The men’s football team from Rhodes could be thrown out of the Island Games.

Oddagh skimmee bluckan-coshey ny deiney veih Rhodes ve er ny cheau magh ass Gammanyn ny h-Ellanyn moghrey jiu, lurg da queig cloiederyn ocsyn ve er nyn gur ersooyl ayns gamman kerroo-yerrinaght (quarter final) fastyr jea noi Guernsey, yn ashoon-cuirreyder (host nation).
Kyndagh rish reillyn y ghamman, begin da’n fer-reaghys y gamman y chur seose tra daag y wheiggoo chloieder y magher. Va mysh kerroo oor jeh’n traa faagit eisht, as Guernsey leedeil liorish jees noi nane.
Honnick fir-naight veih Radio Vannin cloiederyn veih Rhodes, yn ellan Veanvooir, prowal dy vrishey sheese dorrys y fer-reaghys ec lieh-hraa. As ec lane-traa, va feed meoir-shee, paart jeu lesh moddee, ec çheu yn vagher.
Va shirveishagh Cair-Chredjuagh Greagagh ayns gooyn liauyr doo ry akin, as eshyn guee er cloiederyn Rhodes dy ve kiune.
Haghyr shoh er y laa va Gammanyn Daa Veeilley as Shiaght er nyn stowal er yn ellan Greagagh liorish Sheshaght Eddyrashoonagh Gammanyn ny h-Ellanyn. Roish gamman y laa jea, v’ad briaght jeh’n Arrymagh Brian Partington, Lhiass-Chaairliagh y Çheshaght, mychione faaueyn nagh beagh Rhodes y reih share.


DUTCH ELM DISEASE IN DOUGLAS
The new outbreak is far away from the main area of infection.

Ta gorley-lhiouan Ollanagh er ny ’eddyn ayns daa villey ayns Doolish. Shoh brishey-magh noa, as t’eh foddey ersooyl veih’n vrishey-magh smoo, t’er y twoaie.
Ta’n Rheynn Eirinys, Eeastagh as Keylljyn freayll arrey er y ghaue ta baggyrt er lhiouanyn slayntoil ayns yn Ellan.
Robin Pollard, Ard-Offishear ny Keylljyn, t’eh gra dy bee eh olk da’n Ellan my vees y gorley goll er skeaylley.


NEW RAILWAY MAINTENANCE MACHINE
The machine will re-align and level the 62 miles of track.

Ta’n Rheynn Turrysid as Soccar er chionnaghey carbyd son daa cheead as feed meeilley punt (£220,000) cour cummal seose raaidyn-yiarn Vannin. T’ad gra tampeyr rish y jeshaght shoh, as nee ee gaa-yeeraghey as jannoo rea ny tree feed as daa veeilley dy skelfyn.
David Howard, Stiureyder Arraghey yn Theay, t’eh gra dy vel y jeshaght jeeaghyn quaagh, agh bee obbyr scanshoil jeant eck.


INCREASE IN SEXUALLY TRANSITTED DISEASE
There is a tendency to overlook sexual health problems.

Yn earroo dy leih as gorlaghyn oc haink orroo kyndagh rish comyssey, t’eh er ngoll seose dy mooar ayns ny bleeantyn jerrinagh, coardail rish y Çhirveishagh Slaynt,
Clare y Christeen. Benainshtyr y Christeen as ish freggyrt feysht veih Leonard Singer, oltey jeh’n Choonseil Slattyssagh, dooyrt ee dy row yn earroo dy hurransee hie gys y Lheelann Gienyçhoil-Mooinagh (Genito-Urinary Clinic) sy vlein daa veeilley as jees, dy row yn earroo shen bunnys daa cheayrt cho mooar as yn earroo sy vlein daa veeilley.
Dooyrt Benainshtyr y Christeen dy vel strateysh slaynt cheintyssagh (sexual health strategy) er ny lhiasaghey, agh dy bee shen laccal tooilley argid veih Rheynn Slaynt as Shickyrys y Theay as veih’n Rheynn Ynsee.
T’ee gra dy vel y doilleeid jeh gorlaghyn feddynit liorish comyssey ry gheddyn ayns ymmodee çheeraghyn . T’ee gra dy lajer dy vel ee currit da cur e laue gys y doilleeid ayns Mannin.
Paul Emerson, Fer-Coyrlee son Slaynt y Theay ayns Mannin, t’eh gra dy vel beoyn ayn dy chur doilleeidyn jeh slaynt cheintyssagh ry lhiattee. Shegin caggey noi’n veoyn shen.


REUNION FOR ELLA OLSEN STUDENTS
The Department of Education is planning a reunion for all the students who have benefited from the Ella Olsen scholarship since 1969.

Ta’n Rheynn Ynsee kiaddey aachruinnaght son ooilley ny studeyryn t’er ngeddyn foays veih scoillaraght Ella Olsen neayr’s y vlein nuy cheead jeig, tree feed as nuy.
Ta’n aundyr goll er giootal da studeyryn bwoirrin eear-cheimagh (postgraduate) dy yannoo studeyrys ayns Idaho. T’eh enmyssit lurg ben veih Rhumsaa va recortysser yn ollooscoill ayns shen.
Yn oyr son yn aachruinnaght mleeaney, shen dy bee daa pheiagh ta jeeaghyn mysh ny studeyryn Manninagh ayns Idaho er yn Ellan son bannish. Y Ven-Toshee jeh Shirveishyn Reiragh sy Rheynn Ynsee, Roz Gash, t’ee gra nagh vel eh aashagh d’eddyn ooilley ny mraane hooar yn scoillaraght. Agh t’ee jerkal dy jig cho whilleen jeu gys yn aachruinnaght as oddys ad.
Hed yn aachruinnaght er cummal ec kiare er y chlag er y chiarroo laa as feed jeh Jerrey Souree ec y Rheynn Ynsee ayns Cooyrt Noo Shorys ayns Doolish.


Manx surnames: Casement

This is from Mac Ásmundr - a typical Manx combination of Gaelic ‘Mac’ (‘Son’) with Norse ‘Ásmundr’ - mean Son of Ásmundr (Fee of the Gods). There are just five Casements in the current Isle of Man phonebook.
Roger Casement, who was of Manx descent, was knighted for exposing atrocities in the Belgian Congo in the early 20th century. He became an Irish Republican and was executed for his part in the Easter Rising of 1916.


Naight Radio Vannin 9.7.03

CHIEF MINISTER CONDEMNS LEAGUE’S ‘WILFUL CONFUSION’
The Celtic League was responding to the Mount Murray Inquiry report.

Ta’n Ard-Shirveishagh, Richard Corkill, er deyrey yn Commeeys Celtiagh son ‘mestid tooilloil jeh’n chooish’ sy chur-magh naight (press release) oc mychione trulleeys (corruption).
Hug y Commeeys magh y fockley shoh kyndagh rish yn imraa mychione lhiasaghey Cronk Murray. Dooyrt ad dy vel briwnys yn imraa soilshaghey ‘stayd feer voiragh’ bentyn rish yn aght va rheynnyn-reiltys, politickeyryn as fir-oik dellal rish y lhiasaghey.
Ta’n Ard-Shirveishagh gra dy vel y fockle ‘trulleeys’ ry akin sy chur-magh daa cheayrt yeig, gyn soilshaghey magh nagh dooar Commishoon Brialtys Cronk Murray prowalys erbee jeh ‘trulleeys’, goaill ymmyd jeh’n ockle lesh y cheeayll chadjin. Dy jarroo, t’eh gra, “ta’n imraa hene gra ‘cha dooar shin feanish jeh trulleeys sy cheeayll chadjin jeh eeckyn neughlen, giootyn ny reddyn elley myr shen, bentyn rish lhiasaghey Cronk Murray”.
Eisht ta Mainshtyr Corkill gra dy vel y cur-magh naight cur er y ‘vestid tooilloil’ shoh dy ve ny smessey liorish y faaue dy vel Brialtys Cronk Murray yn un red as Binshyn Nerin (the Irish Tribunals), ta dy firrinagh bentyn rish sollaghey-laue as trulleeys argidoil. Ta shoh cur reayrt cammit jeh briwnys y Vrialtys, t’eh gra, cur er sleih çheu-mooie jeh’n Ellan vees lhaih cur-magh y Chommeeys Celtiagh dy chredjal dy vel prowalys jeh sollaghey as kionnaghey er ny eddyn, as cha nel shen kiart.


DAVID LAMMY TO VISIT ISLAND
Tottenham MP David Lammy is the latest member of the British Parliament to be given responsibility for the Crown Dependencies.

David Lammy, yn oltey jerrinagh jeh’n Ardwhaiyl Ghoaldagh d’eddyn freggyrtys son ny Crogheenyn-Crooin (Crown Dependencies), t’eh kiarail cur shilley er Mannin.
Yn oltey jeh Kiare as Feed Hostyn son Tottenham, cha row Mainshtyr Lammy rieau ayns Mannin roïe. Agh t’eh gra dy vel eh er ngeddyn cooney liorish fysseree va currit da ayns e rheynn-reiltys, as liorish loayrt rish Michael Wills as Rosie Winterton, va jannoo yn kiartey roish shoh.
Va naighteyr ayns Mannin briaght jeh David Lammy noddagh Mannin jeeaghyn roee gys kiangley messoil noa lesh y Reeriaght Unnaneyssit as y currym noa shoh echey. Ta’n freggyrt echey ry chlashtyn er ynnyd-eggey Radio Vannin.


BOARD OF EDUCATION CANDIDATE HAS RESERVATIONS ABOUT SYSTEM
Cath Andrews says strict timetabling stifles the skills of teachers.

Coardail rish Cath Andrews, yeearreyder sy fo-reihys ayns Garff son y Boayrd Ynsee yn çhiaghtin shoh çheet, ta Rheynn Ynsee Vannin feer vie, agh ta olk currit urree liorish neulhoobid.
Ta Cath Andrews gra dy vel scoillyn Vannin geddyn argid mie as stooghyn mie.
Agh yn aght neulhoobagh ta traaghyn-ynsee goll er reaghey, t’eh plooghey schleiyn ny h-ynseyderyn. Ny sodjey, t’ee gra dy vel feme ayn er cormid eddyr ynsaghey cour speeideilys ayns scrutaghtyn, as ynsaghey cour beaghey.
Ta Benainshtyr Andrews gra dy vod y Boayrd Ynsee jannoo red ennagh mychione shen.
Hed fo-reihys y Voayrd Ynsee er cummal ayns Garff er y çhiaghtoo laa jeig jeh Jerrey Souree. She Elizabeth Godby yn yeearreyder elley.


RAMSEY CELEBRATES NATIONAL WEEK
Ramsey National Week began last Saturday with an exhibition.

Ghow Shiaghtin Ashoonagh Rhumsaa toshiaght Jesarn shoh chaie lesh taishbynys sy Halley Balley, enmyssit ‘Balley Rhumsaa, Balley Rhumsaa’, veih’n arrane ardghooagh.
Ta shiaghtin dy chelloorey (celebration) goll er yn çhiaghtin shoh, lesh giensaghyn-straiddey as cosheeaghtyn-fysseree (informative walks). T’ad shoh er nyn reaghey myr ayrn jeh ventyr dy chur Rhumsaa er e hoshiaght myr balley hed er bishaghey.
Oltey jeh’n Chiare as Feed son Rhumsaa, Anne Craine, t’ee gra dy vel yn çhiaghtin er ny reaghey dy chur moyrn ashoonagh da ny cummaltee.


Manx surnames: Cashen, Cashin

These are slight variations, coming from the Gaelic Mac Caisín - ‘Son of Curly’, or, more precisely, ‘Son of the Small Curly Haired One’. Less pleasantly, maybe ‘Son of the Small Crooked One’.


Naight Radio Vannin 16.7.03

TYNWALD DEBATES MOUNT MURRAY
Tynwald last night received the report of the Mount Murray Commission of Inquiry.

Lurg resoonaght ren goll er mysh queig oor dy lieh, ren Tinvaal goaill rish imraa Commishoon Brialtys Cronk Murray. Hug Tinvaal moyllaghyn yn imraa da Coonseil ny Shirveishee cour tooilley sursmooinaghtyn.
Lhiasaghey veih Bill Henderson, oltey jeh’n Chiare as Feed son Doolish Twoaie, v’eh speeideilagh liorish tree votyn as feed noi tree. Ta’n lhiasaghey cur er Coonseilee ny Shirveishee yn feme dy chaghlaa as dy hessal (assess) ny tree moyllaghyn as feed t’ayns yn imraa, as dy ghra tra vees Tinvaal soie reesht ayns Jerrey Fouyir cre choud as oddys ny moyllaghyn goll er cooilleeney.
Yn oltey hug roish y treealtys hug y brialtys fo raad, Peddyr Karran, oltey son Kione Droghad, dooyrt eshyn nagh dod yn Ard-Shirveishagh as e cho-obbreeyn cur ersooyl yn imraa as ny va feddynit magh liorish shenn raaghyn follym as smooinaghtyn mianagh. Ghow Mainshtyr Karran ayrn sy resoonaght lesh oraid screeut.


ALLAN BELL’S APOLOGY TO TYNWALD
Allan Bell, the politician who received most criticism in the Mount Murray report, apologised if he had been naïve or over enthusiastic in supporting the development.

Allan Bell, yn eear-shirveishagh son turrysid as y politickeyr hooar y cremeydys smoo ayns imraa Cronk Murray, ren eh goaill leshtal rish Tinvaal my v’eh er ve credjallagh ny ro yeean as eshyn pohlldal lhiasaghey Cronk Murray.
Hug eh failt er y vriwnys nagh row trulleeys argidoil er ve ayn tra va’n skeym goll er coardail as çhyndaa veih lhiasaghey-turrysid gys lhiasaghey-thieyn.
V’eh foast jiooldey yn faaue v’eh er ve faggys dy neuchooie da’n fer-lhiasee. Dooyrt Commishoon Brialtys Cronk Murray dy dug shen traastey er fir-oik plannal dy lowal y skeym.


SCHOOL PLANNED FOR OLD NOBLE’S SITE
The school would be built in the next four or five years.

Ta Steve Rodan, y Shirveishagh Ynsee, er veeraghey dy vel y Rheynn Ynsee kiarail troggal bunscoill noa er ayrn jeh ynnyd shenn Thie-Lheihys Noble. T’eh gra dy vel y skeym ayns ny plannyn bunargidoil, ga nagh vel ny myn-reddyn reaghit foast.
Ragh y scoill er troggal ayns kiare ny queig bleeaney dy hraa, mygeayrt y vlock-ward noa, va kiaddit dy ve ceaghlit cour y lheid. Va faaue er ve ayn dy jinnagh y scoill noa goaill yn ynnyd jeh Scoill Lhiennoo Ballacloan as Bunscoill Magher y Vargee (Fairfield). Agh nish, ta’n Shirveishagh gra, foddee dy bee ny scoillyn shoh tannaghtyn as gobbraghey marish y scoill noa.
Veagh Rheynn Slaynt as Shickyrys y Theay foast goaill ymmyd jeh ayrn jeh’n ynnyd, agh ta Mainshtyr Rodan gra dy vel reamys dy liooar da scoill neesht.


STEAM PACKET WILL BE UNAFFECTED BY TAKEOVER
The Chief Executive of the Steam Packet expects the takeover by Montagu Private Equity Limited to be a ‘seamless transfer’.

Ta Hamish Ross, Ard-Sheckteragh y Phaggad Bree, smooinaghtyn dy bee caghlaa gyn boirey veih un shellooder gys shellooder elley tra vees y Paggad Bree kionnit son keead as jees as daeed millioon punt liorish Cairys Argidagh Preevaadjagh Montagu Çhiarmaanit.
Ta Mainshtyr Ross gra dy jean ooilley ny reddyn scanshoil ec y cholught, goll rish y lhuingys, y lught-reirey as skimmeeyn elley er y thalloo as er y cheayn, dy jean ad tannaghtyn myr t’ad nish. As nee yn strateysh cour aase tannaghtyn myr t’ee myrgeddin.
Cha jean ennym y cholught, Colught Paggad Bree Ellan Vannin, goll er caghlaa.
Ta Mainshtyr Ross gra dy vel Montagu kionnaghey colught speeideilagh as t’ad booiagh d’aagail eh myr t’eh.


Manx surnames: Christian

This is a Gaelic-Norse name, coming from Mac Kristinn, meaning Son of the Christian. When most of the Vikings were still pagan, they called a Viking who had converted to Christianity ‘Kristinn’ - and there is evidence they made fun of such converts.
Historically, the most famous Christian was William Christian, or Illiam Dhone, who was executed in 1663. Illiam Dhone is credited with preserving Manx independence.


23.7.03

PRIVATE OPERATIONS COULD AFFECT NHS
Leonard Singer believes the best
way forward is to encourage a major private healthcare provider to set up in the Isle of Man.

Oltey jeh’n Choonseil Slattyssagh, Leonard Singer, t’eh boirit dy noddagh obbraaidyn (operations) preevaadjagh cur yn olk orroosyn ta fuirraghtyn rish obbraaidyn fo’n Çhirveish Slaynt Ashoonagh.
Vrie eh feysht ny ghaa tra va Tinvaal soie yn vee shoh, as dreggyr y Shirveishagh Slaynt, Clare y Christeen.
Ta Mainshtyr Singer credjal dy bare greinnaghey colught-slaynt mooar preevaadjagh dy heet gys Mannin dy yannoo lheid ny h-obbraaidyn.


CHIEF MINISTER LAUNCHES ‘LIVE AT HOME’ SCHEME
The new ‘Live at Home’ scheme in Onchan was officially launched last night.

Y skeym noa ‘Cummal ec y Thie’, ren eh goll er lunney ayns Kione Droghad riyr.
She yn Ard-Shirveishagh Richard Corkill ren y sharmanys (ceremony). Voyll eh yn obbyr ayns Forsdal as Balley Keeill Eoin, raad ta ventyryn myr shoh er ve fo raad rish kuse dy vleeantyn. Ta’n Ard-Shirveishagh ny chaairliagh jeh skeym Chione Droghad, as she oltey jeh’n Chiare as Feed eshyn son yn ard.
She yn dean dy ghreinnaghey arryltee dy yannoo caarjyn jeh sleih shinney ta nyn lomarcan, ny cummal ayns boayl fadaneagh. Dooyrt Mainshtyr Corkill dy row eh jerkal dy beagh moggyl dy skeymyn myr shoh currit er bun feiy’n Ellan ayns ny queig bleeaney ta roin. Ta ventyryn myr shoh scanshoil, dooyrt eh.


POLICE OFFICERS’ BAIL RENEWED
Two police officers face various offences.

Tra hie daa veoir-shee kionfenish yn Ard-Vaylee reesht, va ny raanteenyn oc jeant ass y noa, gys y nah laa yeig jeh Mee Luanistyn.
T’ad kyndaghey Raymond James Forbes lesh jeih loghtyn as feed. T’eh voish Cooyrt y Ven-Rein, Rhumsaa, as t’eh un vlein as daeed
dy eash. Ta ny loghtyn goaill stiagh maarleeys, geddyn argid liorish molteyrys, farscreeu as molteyrys.
T’ad kyndaghey Simon Arthur Grayley lesh tree loghtyn. T’eh voish Raad Doolish, Skylley Maayl, as t’eh lieh-cheead blein dy eash. Ta ny loghtyn cooney as greesaghey molteyrys, as coontysseyraght foalsey.
Doo